Máis de 40 novas citas musicais en Galicia este agosto cos Concertos do Xacobeo
Os Concertos do Xacobeo chegan a agosto con forza. A programación impulsada pola Xunta de Galicia incorpora este mes máis de 40 novas propostas musicais para todos os públicos e estilos, consolidándose como unha das grandes apostas culturais e turísticas do verán galego.
Entre os festivais e ciclos patrocinados destacan nomes imprescindibles como o Festival da Luz, Costa Feira, Nachiños Fest, MeirásLand, Orballo Cultural, Río Verbena ou Galicia Fest, ademais de citas populares como as Festas de María Pita na Coruña, que se prolongarán ata o 31 de agosto con directos de Baiuca ou Zahara. Tamén sobresaen os concertos das Festas de Ferrol (do 22 ao 31 de agosto), con Omar Montes, Vicco, Lérica e Chema Rivas, entre outros.
Figuras como Leiva, Carlos Núñez, Xoel López, Coque Malla, Herdeiros da Crus, Guitarricadelafuente, Mondra, Depedro, Rozalén, Los Secretos, Sés ou Mikel Izal forman parte dun cartel que abrangue desde a electrónica ata a canción de autor, pasando polo rock clásico, o pop bailable, a música tradicional ou a urbana.
En palabras do director de Turismo de Galicia, Xosé Merelles, “en 2021 naceu o selo Concertos do Xacobeo, baixo o lema A música é o camiño!, para impulsar a música en directo como motor cultural, económico e turístico. Este 2025 o proxecto consolídase, con máis de 2,5 millóns de espectadores en tres anos e máis de 150 eventos patrocinados, 40 deles en agosto”.
Ademais dos grandes formatos, o programa tamén apoia proxectos emerxentes, escenarios alternativos e directos íntimos que permiten vivir a música de preto. O obxectivo é reforzar o papel de Galicia como destino musical de referencia, dinamizando a economía local, apoiando o comercio e a hostalaría e poñendo en valor o patrimonio e a paisaxe galega.
Máis de 800 artistas internacionais, estatais e galegos pasarán polo ciclo en 2025. O programa completo pódese consultar en www.concertosdoxacobeo.gal.