Mateo e Sofía son os nomes máis frecuentes para os nenos e nenas nados en Galicia
Mateo e Sofía repetiron como os nomes máis empregados para os nenos e nenas que naceron en Galicia durante o pasado ano 2025.
Así o sinala a estatística publicada hoxe polo Instituto Galego de Estatística sobre os nomes dos neonatos galegos correspondentes ao ano 2025. Nela sinálase, nunha listaxe que contén cincuenta nomes ordenados de maior a menor frecuencia, que os cinco máis empregados no caso dos nenos foron Mateo, Martín, Hugo, Lucas e Leo, e no das nenas Sofía, Vega, Noa, Olivia e Martina.
No ano 2024, Sofía tamén ocupou o primeiro posto dos nomes femininos, seguido de Vega, Noa e Martina. En canto aos nomes masculinos, Mateo foi o nome máis empregado, acompañado de Martín, Leo e Hugo.
O IGE tamén dispón na súa páxina web de información relativa aos nomes e apelidos da poboación que reside en Galicia atendendo á súa distribución municipal, concello e década de nacemento.
Por exemplo, con datos a 1 de xaneiro de 2025, actualizados tamén hoxe, os nomes máis frecuentes na nosa comunidade son, por orde, Manuel, María Carmen, José, María e José Manuel. No caso dos apelidos, Rodríguez, Fernández, González, López e García son os máis habituais.
