Monforte inaugura a VIII edición do Festival do Viño da Ribeira Sacra con 27 adegas e unha ampla programación
Monforte de Lemos acolle desde este venres e durante toda a fin de semana a VIII edición do Festival do Viño da Ribeira Sacra, unha cita xa consolidada que converte o Paseo do Malecón no principal escaparate dos viños da Denominación de Orixe e nun punto de encontro para os amantes da enogastronomía e da cultura do territorio.
O certame arrancou coa inauguración oficial e o pregón pronunciado por José Manuel Silva Rodríguez, coñecido como Cuqui Silva, unha das figuras galegas con maior proxección internacional nos ámbitos da agricultura, o desenvolvemento rural, a investigación e as políticas europeas. No acto participou o alcalde de Monforte, José Tomé Roca, acompañado por membros do equipo de goberno municipal e unha ampla representación institucional.
Durante a súa intervención, o rexedor destacou que o Festival do Viño naceu coa finalidade de promocionar e poñer en valor os viños da Ribeira Sacra, un obxectivo que, segundo indicou, segue plenamente vixente. Tomé mostrou ademais o seu desexo de que a Ribeira Sacra sexa recoñecida proximamente como Patrimonio Mundial e subliñou que esta cita se converteu nun dos eventos máis importantes do calendario festivo e cultural do municipio.
O alcalde atribuíu o éxito do festival á calidade dos viños da denominación, ao crecemento sostido do evento grazas a unha organización rigorosa e á estreita colaboración co sector vitivinícola. Neste sentido, recoñeceu o esforzo realizado por adegueiros e viticultores para superar as dificultades dos últimos anos e reiterou o compromiso do Concello coa promoción do territorio e dos seus produtos.
A edición deste ano reúne un total de 27 adegas adscritas á Denominación de Orixe Ribeira Sacra, representando as distintas subzonas produtoras. Xunto á oferta vitivinícola, o festival conta cunha destacada presenza gastronómica, con doce expositores que ofrecerán produtos de proximidade como queixos, embutidos, xamóns, xeados artesáns, panadería tradicional e diferentes elaboracións de restauración.
O recinto mantén a estética das edicións anteriores, apostando por materiais naturais e espazos pensados para mellorar a experiencia dos visitantes. Ademais, dispón de zonas de sombra, puntos de información, conexión wifi aberta e un espazo expositivo no que se pode percorrer a historia do festival a través dos carteis das súas distintas edicións.
A programación inclúe tamén actuacións musicais no propio Paseo do Malecón. Tras a participación dos Xograres de Lemos e do histórico grupo A Roda na primeira xornada, o sábado será a quenda de Galifunk, que ofrecerá un concerto marcado pola mestura de ritmos festivos, funk, rock e pop.
As actividades formativas relacionadas co mundo do viño volverán ocupar un lugar destacado nesta edición. O programa contempla dúas catas temáticas dirixidas por profesionais do sector e unha masterclass impartida por Jonas Tofterup, Master of Wine e fundador da Iberian Wine Academy, que analizará a influencia dos solos de xisto na personalidade dos viños da Ribeira Sacra e doutras rexións internacionais.
O festival reserva tamén un espazo para o público infantil, con contacontos, obradoiros, actividades creativas e espectáculos de monicreques, así como para os visitantes que desexen coñecer de preto a viticultura heroica da comarca a través das tradicionais ViñoRutas polo Sil e polo Miño.
Entre as novidades desta edición destaca a posta en marcha dunha iniciativa solidaria mediante a venda de pulseiras conmemorativas, das que a metade da recadación será destinada a unha entidade benéfica de Monforte. Con esta ampla programación, o Festival do Viño da Ribeira Sacra reafírmase como unha das grandes citas enoturísticas e culturais de Galicia, combinando promoción vitivinícola, gastronomía, música e divulgación nun dos escenarios máis emblemáticos da comarca.