Noites do Porto expande a súa programación cultural coa terceira edición de Noites coa Arte na Coruña
O festival Noites do Porto continúa a reforzar a súa presenza na cidade máis alá da programación musical, apostando pola conexión entre a música e outras disciplinas artísticas. Neste contexto, o vindeiro venres 19 de xuño inaugúrase a terceira edición de Noites coa Arte, unha iniciativa que converte a creación plástica nunha extensión do espírito do festival.
A mostra poderá visitarse ata o 5 de xullo no Bar B, situado na rúa Santiago 17, espazo que se consolida como sede desta proposta tras acoller a edición anterior. A iniciativa busca achegar a arte contemporánea ao público nun formato aberto e accesible, integrando a actividade cultural no tecido urbano da cidade.
Nesta ocasión participan once artistas da escena creativa coruñesa: Alejandro Mosquera, Elena Corredoira, Fernando Voyeur, Giovanna Lopalco (Pelo Di Cane), Juan Balay, Julia Abalde, Lara Pintos, Manuel Suárez, Nin9 st., Taccone e Guillermo Arias (Hangtheguille). Cada un deles reinterpretou o cartel e a identidade das distintas xornadas de concertos da programación de Noites do Porto 2026, achegando unha visión persoal e contemporánea da proposta musical.
Durante a presentación oficial, que terá lugar ás 13.00 horas no propio local, explicaranse os detalles desta colaboración artística, que se consolidou como unha das liñas creativas máis destacadas do festival. O proxecto non só busca visibilizar o talento local, senón tamén construír unha colección artística propia que quede como arquivo vivo das diferentes edicións.
Desde a organización destacan que esta iniciativa naceu hai varias edicións coa reinterpretación do cartel xeral e que, desde 2025, evolucionou cara a unha proposta máis ampla que inclúe a lectura artística de cada xornada de concertos, abrindo ademais a exposición ao público xeral. Con isto, Noites do Porto pretende afondar na súa relación coa cidade e co seu ecosistema creativo.
A programación musical arrinca o 22 de xuño con concertos xa esgotados e grandes nomes internacionais
A apertura de Noites coa Arte servirá tamén como antesala do inicio da programación musical do festival, que comezará o luns 22 de xuño no Jazz Filloa co concerto de Lela Soto, cuxas entradas xa están esgotadas.
A sexta edición de Noites do Porto inclúe actuacións destacadas no peirao de Batería, como a celebración da Noite de San Xoán con Xoel López e Caamaño&Ameixeiras, así como concertos de artistas e bandas como The Horrors, COTI, Monsieur Periné, Curtis Harding, Barry B, Vera Fauna, ELLiS·D, La Tania, María José Llergo e Nadadora.
O programa complétase coas tradicionais sesións de Noites nos Bares, que levarán a música a diferentes locais emblemáticos da cidade, reforzando o carácter urbano e descentralizado do festival.
As entradas continúan á venda a través da páxina oficial www.noitesdoporto.com, mentres que a exposición Noites coa Arte poderá visitarse de forma gratuíta durante todo o período de apertura.