'Noites do Porto Recomenda' amplía o seu mapa musical con novas citas en Vigo e Santiago
O ciclo 'Noites do Porto Recomenda' continúa a ampliar a súa programación e estende por primeira vez a súa actividade ata Vigo, ademais de sumar unha nova cita en Santiago de Compostela. A programación de outono incorpora tres novos concertos internacionais que se engaden ás actuacións xa anunciadas de Nacho Vegas na Coruña e Temples en Santiago.
A chegada a Vigo producirase no Mondo Club, que acollerá dous dos novos concertos. O primeiro será o 5 de decembro, coa actuación de ELLiS·D, músico británico que regresará a Galicia despois do seu paso pola Coruña e Madrid o pasado mes de xuño.
Co nome artístico de Ellis Dickson, o músico desenvolverá en directo a súa mestura de glam-punk, psicodelia e influencias góticas, presentes en traballos como o EP Spill. A súa proposta caracterízase por un directo de forte compoñente rítmico e por unha posta en escena dinámica.
A segunda cita no Mondo Club será o 13 de decembro, coa actuación de EMEL, nome artístico de Emel Mathlouthi. A compositora e cantante de orixe tunisiana e nacionalidade estadounidense presentará en Vigo as cancións do seu cuarto álbum de estudo, MRA.
A artista combina electrónica, vangarda, ritmos do norte de África e sons orientados ás pistas de baile. A súa traxectoria internacional medrou especialmente a partir de Kelmti Horra, canción que se converteu nun dos símbolos musicais asociados á Primavera Árabe e que a levou, entre outras citas, a actuar na cerimonia do Premio Nobel da Paz.
Sharp Pins chega por primeira vez a Galicia
O ciclo tamén suma unha nova parada en Santiago de Compostela. O Riquela Club recibirá o 15 de novembro a banda estadounidense Sharp Pins, liderada por Kai Slater, músico vinculado á escena de Chicago e integrante de formacións como Lifeguard ou Dwaat Troupe.
O trío completado por Joe Glass e Peter Cimbalo presentará os seus traballos Mod Mayday 23 e Electric My Icebox, cun son baseado no power pop acelerado e unha produción de estética lo-fi.
A actuación será a primeira da banda en Galicia e permitirá coñecer en directo unha proposta con influencias de grupos e artistas como Guided By Voices, Elliott Smith, The Byrds ou The Lemon Twigs.
A cita de Sharp Pins chegará un día antes da actuación de Temples, prevista para o 16 de novembro na Sala Capitol. A banda británica presentará en exclusiva en Galicia o seu novo disco, BLISS.
Cinco concertos repartidos entre tres cidades
Con estas novas incorporacións, 'Noites do Porto Recomenda' contará con cinco citas repartidas entre A Coruña, Santiago e Vigo.
A programación comezará o 6 de novembro na Coruña, coa actuación de Nacho Vegas na Sala Inn, onde presentará en exclusiva na cidade o seu traballo Vidas semipreciosas.
En Santiago chegarán posteriormente Sharp Pins e Temples, mentres que Vigo se incorpora ao percorrido con ELLiS·D e EMEL.
As entradas para os concertos de Sharp Pins, Temples, ELLiS·D e EMEL están dispoñibles a través de Ataquilla, mentres que os billetes para o concerto de Nacho Vegas poden adquirirse a través de Fever Up.