Novas oportunidades de negocio para sectores con potencial na provincia de A Coruña
A Deputación da Coruña deu este venres o primeiro paso do programa Provincia Emprendedora coa celebración das primeiras mesas de diagnóstico sectorial, unha iniciativa coa que busca coñecer mellor a realidade das empresas da provincia e detectar novas oportunidades de negocio e emprego.
As sesións desenvolvéronse na sede da Confederación de Empresarios da Coruña e forman parte do Plan de Emprego Local. Nesta primeira xornada, o traballo centrouse en dous ámbitos con capacidade de crecemento: as enerxías renovables, a economía circular e a sustentabilidade, por unha banda, e a innovación, as TIC e o sector audiovisual, pola outra.
A deputada de Emprego, Industria e Medio Ambiente, Rosa Ana García, participou na apertura das mesas e destacou que o programa nace coa vontade de escoitar directamente ao tecido produtivo. Segundo explicou, o obxectivo é coñecer as necesidades reais das empresas, identificar os retos que afrontan e converter ese diagnóstico en novas oportunidades para emprender e xerar actividade económica.
O encontro partiu dunha análise inicial de cada sector e dos primeiros datos recollidos a través dun formulario dirixido a empresas da provincia. A partir desa información, os participantes traballaron na detección de necesidades, na busca de posibles nichos de emprendemento e na definición de vías de colaboración entre entidades, empresas e recursos vinculados á Deputación.
O programa terá unha dimensión territorial ampla, coa participación de representantes de diferentes comarcas da provincia, entre elas Bergantiños, Terra de Soneira, Fisterra, Ordes, Betanzos, A Coruña, Eume, Ortegal e Ferrol. Tamén se incorpora persoal da Rede Provincial de Coworking, co fin de achegar a visión dos espazos de traballo colaborativo e das persoas emprendedoras que desenvolven proxectos en distintos puntos do territorio.
A Deputación sinala que estas mesas son o punto de partida para construír unha folla de ruta compartida, baseada no coñecemento directo do tecido empresarial e nas oportunidades que xa están xurdindo na provincia. A intención é que as conclusións sirvan para deseñar ferramentas útiles de apoio ao emprendemento e á consolidación de novas actividades económicas.
Provincia Emprendedora continuará con novas reunións periódicas ata febreiro de 2027. Ao remate do proceso, elaborarase un informe final por cada sector, con propostas e posibles liñas de actuación para seguir impulsando a actividade empresarial, o emprego e o emprendemento na provincia da Coruña.