Novo intento para desbloquear o convenio da hostalaría da Coruña antes da folga do 12 de agosto
As negociacións do convenio colectivo da hostalaría da provincia da Coruña afrontan un novo intento de desbloqueo. CCOO, CIG e UGT solicitaron a apertura dun procedemento de mediación no Consello Galego de Relacións Laborais (CGRL) co obxectivo de retomar o diálogo coa patronal e tratar de achegar posturas antes da folga convocada para o 12 de agosto.
As organizacións sindicais explican que optan por esta vía despois de que, segundo aseguran, a parte empresarial non presentase a proposta de convenio que se comprometera a elaborar durante a primeira semana de xullo.
Nun comunicado conxunto, os sindicatos responden tamén ás declaracións realizadas nos últimos días polo presidente da patronal coruñesa, que cuestionou a vontade negociadora das centrais. Pola súa banda, CCOO, CIG e UGT sosteñen que continúan abertas ao diálogo e consideran que a mediación ofrece unha nova oportunidade para avanzar cara a un acordo.
As organizacións sindicais insisten en que o sector necesita un novo convenio colectivo que mellore as condicións laborais e salariais das persoas traballadoras e lembran que os soldos permanecen practicamente sen cambios desde xaneiro de 2024.
Agora será o Consello Galego de Relacións Laborais o encargado de convocar ás partes para tentar achegar posicións e evitar que o conflito desemboque na folga prevista para a próxima semana.