O 18 de maio marcará o inicio dos descontos eléctricos arredor do parque de Mondigo
A conselleira de Economía e Industria, María Jesús Lorenzana, avanzou que o vindeiro 18 de maio darán comezo os traballos para definir os descontos enerxéticos asociados ao parque eólico de Mondigo, unha medida que beneficiará tanto aos fogares como ao tecido empresarial da contorna. No proceso participarán a Xunta, Recursos de Galicia e representantes municipais e empresariais dos concellos de Ribadeo, Trabada e Barreiros.
Durante a clausura do foro Empresa, Industria e Innovación, enmarcado no programa Conecta Lugo, a conselleira explicou que xa se está a traballar na activación de bonificacións para os fogares situados nas proximidades do parque, que poderán acadar ata un 80 % de redución no consumo eléctrico. Nas vindeiras semanas, engadiu, abordarase tamén o deseño dun plan específico para estender estas vantaxes ás empresas asentadas na zona.
Lorenzana destacou que o proxecto de Mondigo exemplifica o modelo enerxético que promove o Goberno galego, orientado a que a produción de enerxía reverta directamente na cidadanía e na economía local. “Non hai industria sen enerxía”, sinalou, ao tempo que defendeu a necesidade de crear condicións favorables para atraer investimento e consolidar actividade produtiva no territorio.
Nesta liña, apostou por facilitar a implantación empresarial mediante a redución de trámites e a eliminación de barreiras administrativas, así como por reforzar o acompañamento aos proxectos a través da Oficina Económica de Galicia. Segundo indicou, cada iniciativa que non se desenvolve supón unha oportunidade perdida, polo que avogou por unha administración máis áxil e proactiva.
No mesmo encontro participou tamén a conselleira do Medio Rural, María José Gómez, quen puxo en valor o potencial económico de Galicia e, en particular, da comarca da Mariña. Gómez animou ao sector industrial a aproveitar os recursos do agro, o monte e o mar, destacando a importancia de apostar pola innovación, a formación e a diversificación.
A responsable autonómica subliñou o peso do sector lácteo, así como o crecemento doutras áreas como a produción cárnica, a horta ou a planta ornamental. Tamén incidiu no papel do monte como fonte de riqueza e emprego, facendo fincapé na necesidade de incorporar tecnoloxía e mellorar a xestión para avanzar cara a un modelo máis eficiente e sostible.