Actualidade

O Bloque levará ao Parlamento o estado da sanidade pública galega e reclamará explicacións á Xunta pola falta de persoal e investimento na Atención Primaria.

O BNG centrará o vindeiro Pleno do Parlamento na situación da sanidade pública galega, poñendo o foco no estado “crítico” da Atención Primaria tras o informe publicado polo Consello de Contas de Galicia.

Así o avanzou a viceportavoz parlamentaria, Olalla Rodil, quen explicou que a portavoz nacional, Ana Pontón, interpelará directamente ao presidente da Xunta, Alfonso Rueda, sobre a deterioración do sistema sanitario.

Rodil denunciou as “consecuencias nefastas” das políticas sanitarias do Goberno galego e ironizou coa actitude de Rueda asegurando que, “se non é responsable de nada e nada sabe, o mellor que pode facer é dedicarse a andar en bici e deixar que goberne outra persoa”.

Déficits estruturais na Atención Primaria

Segundo o BNG, o informe de Contas evidencia problemas estruturais graves. Entre eles, destacou que Galicia é unha das comunidades con menor investimento en Atención Primaria, que apenas absorbe o 12 % do gasto sanitario, moi lonxe do 25 % recomendado pola OMS.

Ademais, Rodil alertou da falta de cobertura sanitaria, especialmente no rural. Segundo os datos expostos, ata 160 concellos galegos carecen de pediatra e outros 96 teñen que compartir este servizo.

A esta situación súmase a falta de persoal no Servizo Galego de Saúde, cun 28 % de prazas vacantes, chegando a cifras especialmente preocupantes en categorías como matronas, onde seis de cada dez postos non están cubertos.

A deputada tamén fixo fincapé nas listas de espera, que cualificou de “inadmisibles” e que, segundo indicou, vulneran o dereito da cidadanía a unha atención sanitaria “de calidade, próxima e accesible”.

Recuperación de concesións hidráulicas

O Bloque tamén levará ao Pleno unha proposición para que a Xunta recupere concesións hidráulicas caducadas, como as do río Tambre, actualmente en mans da empresa Naturgy.

Segundo explicou Rodil, estas concesións xeran importantes beneficios económicos sen retorno para o territorio. Por iso, o BNG propón que sexan xestionadas por unha empresa pública galega de enerxía, co obxectivo de que a riqueza reverta na sociedade.

Lingua e situación política en Lugo

Entre as iniciativas previstas, o BNG tamén defenderá a aplicación das medidas do Plan de Normalización Lingüística de 2003 para recuperar o consenso arredor da lingua galega e frear a perda de falantes.

Ademais, a formación nacionalista esixirá explicacións ao Goberno galego polo que cualifica de “uso partidista” dos recursos públicos en relación coa moción de censura en Lugo, denunciando supostas irregularidades na convocatoria dunha praza na administración autonómica.