Política

Rego e Carme da Silva alertan do impacto ambiental e critican o apoio do Estado a un proxecto ligado á estratexia europea de materias primas críticas

O Bloque Nacionalista Galego realizou unha acción simbólica, reivindicativa e de denuncia en Beariz para alertar do que cualifica como “saqueo continuado dos recursos naturais da Galiza”. No acto participaron o deputado no Congreso, Néstor Rego, e a senadora Carme da Silva, quen puxeron o foco no proxecto da mina de Doade, impulsado no marco da estratexia europea de materias primas críticas e do programa de rearmamento da Unión Europea.

A formación nacionalista trasladou a súa oposición firme a esta iniciativa, á que considera prexudicial para o territorio, o medio ambiente e os intereses da maioría social galega. No acto participaron tamén militantes e simpatizantes do BNG, con despregamento de faixas e da bandeira galega.

A acción enmárcase na campaña do BNG contra novos proxectos extractivos vinculados á demanda europea de recursos estratéxicos, que segundo a organización pretenden garantir subministracións para a industria tecnolóxica e militar a costa dos territorios periféricos.

Néstor Rego cualificou o proxecto de Doade como un novo exemplo do modelo histórico de espolio que sofre Galiza, asegurando que se pretende converter o país nunha “colonia de extracción de recursos” ao servizo de intereses alleos. Engadiu que o litio e outros recursos naturais saen do territorio mentres os impactos ambientais e sociais quedan no lugar de orixe.

O deputado lembrou ademais as iniciativas presentadas polo BNG para reclamar explicacións ao Goberno do Estado pola inclusión da mina de Doade na listaxe europea de proxectos estratéxicos de materias primas críticas, vinculada ao programa REARM EUROPE, e para que retire o seu apoio ao proxecto.

Segundo denunciou, o Executivo recoñeceu que non presentou obxección á súa inclusión, malia tratarse dunha mina previamente rexeitada polo seu impacto ambiental e incorporada á lista sen unha avaliación técnica e ambiental previa coñecida. Considera que acelerar este tipo de proxectos en nome do rearmamento europeo é inaceptable.

Pola súa banda, Carme da Silva advertiu de que o proxecto xa fora rexeitado no pasado polos seus efectos sobre os recursos hídricos e polo seu elevado impacto ambiental, e cuestionou que se pretenda reactivar agora unha iniciativa que afecta de forma directa a concellos como Beariz, A Lama e Cerdedo-Cotobade.

A senadora criticou que a declaración como proxecto estratéxico por parte da Comisión Europea busque acelerar a súa tramitación administrativa, reducindo garantías ambientais e limitando a transparencia. Sinalou que non se pode aceptar que a política de materias primas para a industria armamentística se realice á custa do territorio.

Carme da Silva concluíu que a mina de Doade representa un modelo económico extractivista que deixa os custos ambientais en Galiza mentres os beneficios se trasladan fóra, defendendo o dereito do país a decidir sobre os seus recursos naturais e o seu futuro fronte a este tipo de proxectos.