O BNG presenta o cartel da campaña electoral co obxectivo de conseguir representación de Lugo no Congreso
O BNG presentou o cartel co que pedirá o voto nas eleccións xerais do vindeiro 29 de novembro. A cabeza de lista ao Congreso, Olalla Rodil, e a candidata número un ao Senado, Brenda González, participaron no acto acompañadas polo resto da candidatura, militantes e simpatizantes da formación nacionalista.
Durante a presentación, as candidatas aseguraron que afrontan a campaña "con forza, ganas e ilusión" e marcaron como principal obxectivo conseguir que Lugo conte por primeira vez con representación do BNG no Congreso dos Deputados.
Rodil destacou a importancia de apoiar a formación nacionalista para frear o avance da dereita e da ultradereita e defendeu que "o voto útil" nese escenario é o do BNG. Ademais, asegurou que a formación está preto de conseguir un deputado pola provincia de Lugo, que, segundo indicou, podería arrebatarlle ao PP.
A candidata animou a confiar nas posibilidades do país e converter os comicios nunha oportunidade para que Lugo teña "unha voz propia en Madrid", sen ataduras ás forzas estatais. "Só se o BNG está no Congreso, os intereses de Galiza e de Lugo estarán representados", afirmou.
A campaña nacionalista terá entre os seus principais eixes o déficit histórico de infraestruturas da provincia, con especial atención ás estradas e autovías. A formación tamén reivindicará a revalorización das pensións, tendo en conta que Lugo ten as segundas máis baixas do Estado.
Rodil concluíu sinalando que as eleccións do 29 de novembro representan unha oportunidade para cambiar as cousas e contar cunha voz forte no Congreso que defenda os dereitos das maiorías sociais.