Eleccións

A formación nacionalista inclúe entre os seus obxectivos electorais a plena normalización lingüística, con medidas para a Administración, os medios audiovisuais e a proxección internacional do idioma

O Bloque Nacionalista Galego (BNG) incorporou ao seu programa electoral de cara ás eleccións xerais do vindeiro 29 de novembro un conxunto de propostas orientadas a acadar a plena normalización do idioma galego. Entre os seus compromisos figura a eliminación das trabas que, segundo a formación, dificultan na actualidade o uso normal da lingua, así como a reivindicación dunha maior presenza do galego na produción e na oferta audiovisual.

As medidas foron presentadas en Vigo por Roberto Pascual, número dous da candidatura nacionalista ao Congreso pola circunscrición de Pontevedra, quen expuxo algunhas das liñas de actuación do partido para avanzar cara a esa normalización plena, en tanto Galiza non conte con plena capacidade de decisión sobre a súa propia política lingüística. Pascual denunciou o que cualificou de discriminación cara ao galego en distintos ámbitos de relación coa Administración central, citando de xeito particular a xustiza e os trámites administrativos.

Neste sentido, o BNG comprométese a defender o dereito a empregar o idioma propio tanto nas resolucións coma nas comunicacións oficiais, a esixir a súa dispoñibilidade en todas as plataformas dixitais e a reclamar o estrito respecto da toponimia por parte dos distintos organismos públicos. “Hoxe a Administración Xeral do Estado é unha fonte permanente de obstáculos para o uso do galego con normalidade”, afirmou Pascual, segundo recolle a nota da formación.

Reforma da Lei Audiovisual

Outro dos eixos do traballo que a forza nacionalista propón desenvolver no Congreso é o ámbito audiovisual. O BNG reclama unha reforma da Lei Audiovisual que garanta a igualdade plena entre as linguas oficiais do Estado e que impulse a difusión e a produción de contidos en galego. Entre as medidas concretas que propón figuran a recuperación de Radio4, o aumento das horas de desconexión territorial de Televisión Española e unha aposta firme polo público infantil mediante a incorporación de programación en galego en ‘Clan TV’.

A formación considera ademais necesario aumentar a partida de axudas destinada ás producións audiovisuais en lingua galega xestionada polo Ministerio de Cultura, ademais de esixir que as plataformas de contidos ofrezan dobraxe e lexendaxe en galego nos seus catálogos, especialmente nos produtos dirixidos ao público infantil.

O candidato nacionalista defendeu tamén que o galego debe ter unha presenza en igualdade de condicións no desenvolvemento da intelixencia artificial e dos servizos dixitais, co obxectivo de evitar que o futuro do idioma quede condicionado por ferramentas privadas que, segundo advertiu, poidan deixar de lado a realidade cultural propia. Para lograralo, reclamou o despregue de liñas de financiamento público destinadas á rexeneración dixital da lingua.

Proxección internacional

Pascual sinalou tamén o ámbito cultural como unha das claves do programa do BNG para dar a coñecer o patrimonio lingüístico galego, subliñando a necesidade de medidas que o promocionen a escala internacional e que permitan difundir as distintas expresións culturais en galego en igualdade de condicións respecto ao resto de linguas oficiais do Estado.

De cara a unha maior proxección internacional do idioma, a formación continuará a reivindicar a súa oficialidade plena na Unión Europea, así como o seu ingreso como membro asociado en organismos como a Unesco ou a Organización Mundial do Turismo (OMT). O partido defende igualmente potenciar o papel de Galiza como ponte natural cara ao espazo lusófono, impulsando políticas de cooperación e aproveitando o valor estratéxico do galego no ámbito internacional.

Advertencia sobre políticas “galegófobas”

O portavoz municipal do BNG en Vigo, Xabier P. Igrexas, incidiu na necesidade de acadar avances “moito máis profundos” nas políticas estatais que garantan o dereito dos vigueses, como galegos, a poderen vivir con normalidade no seu idioma.

Igrexas alertou do que definiu como unha ameaza real para a lingua galega e para os avances acadados nos últimos anos, en relación coas posicións que atribúe á dereita á que cualificou de “ultraespañolista”. “Comezan cuestionando que se poida seguir intervindo en galego na tribuna do Congreso, pero o obxectivo de PP e Vox é estrangular aínda máis a nosa lingua, porque na súa ‘España Una’ non cabe o galego”, exemplificou.

O portavoz municipal reclamou que o galego deixe de ser tratado, na práctica, como un obstáculo e unha lingua de segunda categoría dentro da Administración Xeral do Estado, e lamentou que o idioma siga a atopar dificultades en ámbitos como a Xustiza, onde segundo denunciou algúns organismos chegan a negarse a tramitar reclamacións presentadas en galego malia a súa condición de lingua oficial.

Igrexas referiuse tamén aos datos do último estudo do Instituto Galego de Estatística (IGE), que sitúan a Vigo entre as cidades con menor uso do galego, e defendeu que esta situación non debe traducirse en frustración nin resignación. Ao seu xuízo, non responde a unha decisión libre da sociedade, senón ao resultado de políticas que considera discriminatorias cara á lingua. Concluíu sinalando que en Vigo existe unha maioría social orgullosa do seu idioma, á que o BNG representará con máis forza en Madrid fronte ao que considera unha ameaza de retroceso para o galego.