O BNG reclama explicacións polo atraso na limpeza das faixas secundarias en concellos de menos de 10.000 habitantes
O Bloque Nacionalista Galego esixe ao presidente da Xunta, Alfonso Rueda, explicacións polo que cualifica como o “incumprimento inaceptable” do prazo fixado para a limpeza das faixas secundarias nos concellos galegos de menos de 10.000 habitantes.
A deputada nacionalista Montse Valcárcel criticou que o prazo comprometido polo Goberno galego en setembro de 2025 non se cumpriu. “Ese prazo pasou e o compromiso non se cumpriu”, sinalou, ao tempo que rexistrou iniciativas parlamentarias para reclamar aclaracións e a presentación dun calendario detallado de execución.
Segundo explicou, a Xunta comprometeuse tras o verán de 2025, no que se rexistraron arredor de 120.000 hectáreas queimadas, a investir 25 millóns de euros e completar os traballos antes do 31 de maio de 2026. “Puxo 25 millóns de euros sobre a mesa, asináronse convenios, fixouse un prazo. Ese prazo pasou, e o compromiso non se cumpriu”, engadiu.
Valcárcel denunciou tamén problemas na execución dos traballos, asegurando que hai plans municipais sen aplicar e actuacións pagadas que non se realizaron. “Hai parcelas cuxa limpeza xa foi pagada nas que non se fixo ningún corte. Hai concellos que denuncian que non chegaron medios nin brigadas”, afirmou.
A deputada puxo como exemplo os incendios rexistrados en Valdeorras, Oímbra e O Ribeiro, onde considera que a falta de execución dos traballos tivo consecuencias directas. “O lume do ano pasado queimou terreos que xa foran aboados para limpar. Iso non é un fallo técnico. É un incumprimento presidencial que pon en risco vidas e bens nos concellos máis pequenos de Galiza”, advertiu.
O BNG presentou unha interpelación ao presidente da Xunta, dúas proposicións non de lei e tres preguntas parlamentarias co obxectivo de coñecer o grao de execución por concellos, os quilómetros de faixas limpas e o despregamento de medios. Valcárcel avanzou ademais que a portavoz nacional, Ana Pontón, trasladará a cuestión ao Pleno do Parlamento e reclamará un calendario completo antes do próximo verán.