O BNG reclama un plan integral para recuperar e protexer o río Lagares en Vigo
O Bloque Nacionalista Galego (BNG) de Vigo reclamou ao Goberno municipal de Abel Caballero un cambio profundo na política ambiental relacionada co río Lagares, co obxectivo de superar as actuacións puntuais e avanzar nun modelo de protección integral deste espazo natural. A formación considera insuficientes as intervencións anunciadas recentemente polo Concello nun tramo do paseo fluvial e defende a posta en marcha dun plan de recuperación global.
O portavoz municipal do BNG, Xabier P. Igrexas, apostou pola elaboración dun Plan de Recuperación Integral do Río Lagares, dotado de recursos, planificación e obxectivos concretos. Segundo indicou, esta iniciativa permitiría substituír o que cualificou como unha política de "parcheos" por unha estratexia ambiental a longo prazo para un dos principais corredores ecolóxicos da cidade.
Os nacionalistas alertan da situación de contaminación que afecta ao principal curso fluvial de Vigo. Igrexas lembrou os datos dun estudo da organización The Ocean Cleanup, segundo os cales o río Lagares sería a principal vía de entrada de residuos plásticos á ría de Vigo. Neste sentido, denunciou que o río continúa sufrindo vertidos ilegais e episodios de descarga de augas sen depurar procedentes dos alivios técnicos da estación depuradora.
Como primeira medida, o BNG propón reforzar os mecanismos de control e prevención da contaminación. Entre as iniciativas defendidas figura a implantación dun sistema de telecontrol e videovixilancia en tempo real, así como o incremento das inspeccións nos puntos de vertido considerados máis problemáticos.
A segunda liña de actuación plantexada polos nacionalistas céntrase na recuperación ambiental e na protección do ecosistema fluvial. Para iso, solicitan que os 17,5 quilómetros do río, desde o seu nacemento na lagoa de Mol, en Cabral, ata a súa desembocadura na praia de Samil, sexan declarados Espazo Natural de Interese Local (ENIL).
Segundo o BNG, esta figura permitiría garantir unha protección máis ampla do Lagares e consolidalo como unha infraestrutura verde fundamental para Vigo. A formación considera que o río debe ser tratado como un espazo ambiental estratéxico e non como un ámbito no que se executen actuacións illadas.
Xabier P. Igrexas defendeu a necesidade dunha política ambiental máis ambiciosa para a cidade e asegurou que a recuperación e dignificación do Lagares debe converterse nunha prioridade. O portavoz concluíu reivindicando un modelo urbano baseado na sustentabilidade e afirmou que "o futuro de Vigo só pode ser verde".