O Carballiño acollerá o sábado máis de 40 coches clásicos na cuarta edición da súa gran concentración automobilística
A Praza da Veracruz do Carballiño encherase este sábado de vehículos históricos con motivo da cuarta edición do Memorial José Luis Blanco - Concentración de Coches Antigos, unha iniciativa organizada polo Club Gallego de Automóviles Antiguos en colaboración co Concello carballiñés. A actividade, enmarcada nas festas patronais da localidade, consolidouse como unha cita destacada dentro do calendario de encontros de vehículos clásicos en Galicia.
Está previsto que máis de 40 automóbiles tomen parte na xornada, con modelos procedentes de distintas décadas, dende exemplares dos anos trinta ata vehículos dos sesenta. Segundo explicaron os responsables do club durante a presentación da actividade, trátase dunha mostra variada que permite repasar boa parte da historia do motor a través de pezas coidadas polos seus propietarios.
O programa arrancará ás 10.00 horas coa concentración dos vehículos na Praza da Veracruz, punto de saída do percorrido que discorrerá despois por distintos enclaves da comarca. Arredor das 11.00 horas a comitiva porase en marcha para atravesar localidades e parajes como o IES Chamoso Lamas, Mesego, Banga, Cabanelas, San Clodio, Riobó, Osmo, San Amaro, Cruceiro e Maside, entre outros puntos do itinerario. En Leiro está prevista unha parada para que os participantes poidan desfrutar dalgún petisco antes de continuar a ruta.
Dende a organización subliñouse a satisfacción por volver ao Carballiño e poder desfrutar tanto da comarca como da súa gastronomía durante o percorrido. Así mesmo, quixo porse en valor a figura de José Luis Blanco, quen fora anteriormente presidente do clube galego e dá nome a esta concentración en súa memoria.
Os coches antigos regresarán ao Carballiño arredor das 14.00 horas, momento no que se estacionarán na Praza Maior. Esta última fase do evento permitirá aos veciños e visitantes achegarse ata o centro da vila para contemplar de preto os vehículos que teñan tomado parte na xornada, poñendo así o ramo final a esta cuarta edición do memorial.