O cardiólogo ourensán Moisés Rodríguez incorpórase como novo xefe de Cardioloxía do CHUO
O Hospital Universitario de Ourense conta desde este luns cun novo responsable á fronte do servizo de Cardioloxía. O doutor Moisés Rodríguez Mañero incorporouse hoxe ao centro hospitalario, nun acto de presentación no que participaron o xerente da Área Sanitaria de Ourense, Verín e Valdeorras, Santiago Camba, o director asistencial, Eloy Sánchez, e o director médico, José Manuel Ortigueira.
Natural de Ourense, o especialista regresa á súa cidade natal tras desenvolver a súa carreira profesional no Hospital Clínico Universitario de Santiago, onde exercía como facultativo especialista en cardioloxía desde o ano 2012 e onde obtivera praza en propiedade en 2022.
Licenciado en Medicina pola Universidade de Navarra, realizou a especialidade de Cardioloxía no mesmo centro. A súa formación completouse posteriormente cun período de especialización en electrofisioloxía e tratamento das arritmias no Heart Rhythm Management Center da Universidade Libre de Bruxelas, grazas a unha bolsa da Sociedade Europea de Electrofisioloxía.
Ao longo da súa traxectoria tamén desenvolveu actividade profesional no Houston Methodist Hospital en 2015, considerado un dos centros internacionais de referencia nesta área médica.
Rodríguez Mañero é doutor pola Universidade de Santiago de Compostela cunha tese centrada na fibrilación auricular e ampliou a súa formación mediante estudos de posgrao e diferentes másteres relacionados coa electrofisioloxía cardíaca, os coidados cardíacos agudos, a ecocardiografía e a metodoloxía da investigación.
Xunto á actividade asistencial, o novo xefe de Cardioloxía desenvolveu unha intensa actividade investigadora e científica. É autor de máis de duascentas publicacións en revistas nacionais e internacionais, especialmente vinculadas ás arritmias, a electrofisioloxía e a fibrilación auricular, ademais de participar en distintos proxectos de investigación, varios deles actualmente en desenvolvemento.
No ámbito docente, colaborou durante máis de dez anos coa Universidade de Santiago de Compostela na formación de estudantes de Medicina e especialistas en Cardioloxía, ademais de impartir cursos e actividades formativas dirixidas a profesionais sanitarios.
Moisés Rodríguez toma así o relevo de Miguel Pérez de Juan Romero, que estivo á fronte do servizo de Cardioloxía do Hospital Universitario de Ourense durante os últimos cinco anos e que se xubilou recentemente.