O Celta Femxa Zorka regresa á LF Endesa tras conquistar a Final Four en Navia
O Celta Femxa Zorka volverá competir a próxima tempada na LF Endesa despois de lograr este domingo o ascenso diante da súa afección nun pavillón de Navia completamente cheo. O conxunto vigués culminou unha campaña brillante proclamándose campión da Final Four e recuperando a máxima categoría do baloncesto feminino estatal apenas un ano despois do descenso.
O equipo dirixido por Cristina Cantero confirmou o seu regreso á elite tras superar ao Melilla Ciudad del Deporte nas semifinais e impoñerse na final ao Osés Construcción por 63-53 nun encontro intenso e moi disputado. Máis de 1.500 espectadores ateigaron as bancadas do pavillón vigués e empurraron ás xogadoras celestes nunha cita decisiva que acabou converténdose nunha auténtica celebración.
O partido polo ascenso comezou cun Osés Construcción moi sólido, especialmente grazas ao acerto exterior de Sara Castro, que liderou ás navarras nun primeiro cuarto igualado no que ambos equipos mantiveron un ritmo alto e moita intensidade. O marcador reflectía un empate a 19 ao final dos primeiros dez minutos.
No segundo cuarto, o Celta Femxa Zorka deu un paso adiante e conseguiu abrir as primeiras diferenzas grazas ao traballo colectivo e ao acerto ofensivo de xogadoras como Vennema, Marina Gea e Kelliher. As viguesas chegaron ao descanso cunha vantaxe de dez puntos tras dominar os últimos minutos da primeira metade.
Despois do paso polos vestiarios, o conxunto pamplonés reaccionou cunha mellora defensiva e conseguiu reducir distancias apoiado no bo traballo de Vicky Llorente. Porén, o maior fondo de armario das locais e o dominio interior de Kelliher permitiron ao Celta manter o control do encontro e afrontar o último cuarto cunha renda favorable.
Nos derradeiros minutos, o equipo de Cristina Cantero soubo xestionar a vantaxe ante un rival que acusou o desgaste físico tras un partido de máxima esixencia. Co son da bucina final, Navia converteuse nunha festa para celebrar un ascenso que culmina unha tempada histórica na que o Celta Femxa Zorka bateu ademais o récord de vitorias da competición.