Actualidade | Cultura

O Certame de Teatro 2025 levará oito espectáculos a centros culturais de Vigo, con entrada libre, protagonizados por máis de 100 actores e actrices afeccionados da cidade.

O alcalde de Vigo, Abel Caballero, presentou este mércores o Certame de Teatro 2025, unha iniciativa apoiada polo Concello que ofrecerá oito representacións a cargo de grupos de teatro afeccionado nos centros culturais veciñais da cidade.

Durante un mes, máis de 100 actores e actrices non profesionais darán vida a diferentes propostas teatrais co obxectivo de visibilizar o talento local e fomentar a participación cidadá nas artes escénicas. As funcións comezarán o sábado 4 de outubro e prolongaranse ata o domingo 2 de novembro.

Na presentación, Caballero estivo acompañado polo concelleiro de Cultura, Gorka Gómez, así como por representantes da Agrupación de Centros Deportivos e Culturais de Vigo e do Centro Cultural de Bembrive. O rexedor animou a “encher os auditorios veciñais” para apoiar os grupos de teatro da cidade.

Marcos Castro, da Agrupación de Centros Deportivos e Veciñais, destacou que a programación busca “potenciar aos grupos de teatro e demostrar a actividade dos 32 grupos que forman parte das nosas asociacións”.

A entrada ás representacións será libre ata completar aforo.

Programa

Sábado, 4 de outubro – CVC Valladares: Grupo de Teatro Helios de Bembrive – A taberna sen doo

Sábado, 11 de outubro – SCDR Helios (Bembrive): Grupo de Teatro Porta Aberta – Munuwa

Domingo, 12 de outubro – CCR Cabral: Grupo Lameiro – O lago das meniñas malas

Sábado, 18 de outubro – SCD Atlántida de Matamá: Grupo de Teatro Rueiro – Profesión Precaria

Domingo, 19 de outubro – ACRD Pardavila: A Casa do Teatro – A voda de Esganarello

Sábado, 25 de outubro – AVV Santa Mariña: Grupo de Teatro Tarantela – Alvariño Concueiro

Domingo, 26 de outubro – CCA Rueiro: As Divertidas – Unha merenda de amigas

Domingo, 2 de novembro – SCDR Helios (Bembrive): Teatro Escoitade – A cova das mil abrandares