O CETUR e o IDEGA entregan os primeiros premios que recoñecen o labor investigador en turismo
O Centro de Estudos e Investigacións Turísticas (CETUR), en colaboración co Instituto de Estudos e Desenvolvemento de Galicia (IDEGA), ambos os dous da USC, entregaron no Museo das Peregrinacións e de Santiago os premios aos mellores Traballos de Fin de Grao (TFG) e Traballos de Fin de Máster (TFM) no ámbito do turismo. A iniciativa naceu coa fin de recoñecer traballos académicos universitarios realizados en Galicia que contribúan á análise, comprensión e reflexión sobre a actividade turística, os seus retos e as súas transformacións.
Nesta primeira edición, e no que respecta aos traballos defendidos no curso académico 2023-24, o gañador do premio ao mellor TFG foi Miguel Peña Ávila por ‘O potencial do oleoturismo en Galicia’, presentado no Grao en Turismo e Historia da Universidade de Vigo (UVigo). Así mesmo, concedeuse un accésit a Iago Barreiro Río e Santiago Pérez Acuña polo traballo ‘Desarrollo y validación de una herramienta para la evaluación de la rentabilidad social en proyectos turísticos: Aplicación al destino ‘Ourense Termal’’, realizado no Grao en Administración e Dirección de Empresas da mesma universidade.
No curso 2024-2025, o premio ao mellor TFG recaeu en Laura Prego Rodríguez por ‘Oportunidades de Turismo Azul en Arteixo: Patrimonio Marítimo, Surf y Sostenibilidad’, presentado no Grao en Turismo da Universidade da Coruña (UDC). Pola súa banda, o mellor TFM foi ‘Proposta dun chatbot para divulgar o patrimonio documental do Códice Calixtino a través da IA’, desenvolvido no Máster en Patrimonio Cultural Dixital da USC por Cristina Huertas Gómez.
O xurado estivo integrado por Lucrezia Lopez, directora do CETUR; Iván Meléndez Medela, director de Competitividade de Turismo de Galicia, e Xosé Manuel Cao Rey, xefe do Servizo de Cultura, Turismo e Promoción da Lingua do Concello de Lugo, ambos en representación do Consello do Centro; e María Milagros Vivel Búa, do Departamento de Economía Financeira e Contabilidade da USC, e María de los Ángeles Piñeiro Antelo, do Departamento de Xeografía da USC, en representación do Comité Científico do CETUR.
A través desta iniciativa, o CETUR e o IDEGA buscan fomentar e visibilizar a investigación académica sobre turismo, promovendo o diálogo entre a universidade e os distintos axentes do sector. Ao tempo, os premios contribúen a consolidar e dar proxección a unha das liñas de investigación do Instituto, centrada no estudo do turismo e na súa relación cos procesos de desenvolvemento territorial, económico e social de Galicia. Esta orientación permite reforzar o papel da investigación turística como ámbito de xeración de coñecemento e como ferramenta para comprender os desafíos e as oportunidades que presenta o turismo para o desenvolvemento galego.
Tras a celebración desta primeira edición, o CETUR abrirá proximamente unha nova convocatoria dos Premios, que dará continuidade a esta iniciativa de recoñecemento e impulso da investigación no ámbito do turismo. Ao igual que na primeira edición, os premios estarán dirixidos a recoñecer traballos académicos de fin de grao e de fin de máster desenvolvidos nas universidades galegas, contribuíndo a promover o talento investigador, a xeración de coñecemento e a reflexión sobre os retos e as oportunidades do turismo en Galicia.