Cultura

Catro concellos pontevedreses acollerán proxeccións gratuítas de cinema galego, nun circuíto que xa supera os 6.300 espectadores e o cento de proxeccións na provincia

A Academia Galega do Audiovisual e a Deputación de Pontevedra presentaron unha nova edición do Ciclo Mestre Mateo, o circuíto que achega as producións máis relevantes do cinema galego a localidades da provincia que non dispoñen de salas comerciais. A presentación tivo lugar esta mañá e contou coa participación de representantes dos catro concellos implicados nesta edición.

Nesta ocasión, as proxeccións repartiranse entre os concellos da Estrada, O Campo Lameiro, Mondariz e Oia. Todas as sesións terán acceso de balde, e a programación arrancou este mesmo xoves, 9 de outubro, en Mondariz, coa proxección da película 'As liñas descontinuas', de Anxos Fazáns.

Ao longo desta edición, o público poderá ver un total de oito títulos que foron finalistas na última edición dos Premios Mestre Mateo: 'Sirât', 'As liñas descontinuas', 'Antes de nós', 'San Simón', '360 curvas', 'O son da nova regueifa', 'Deuses de pedra' e 'O silencio herdado'.

Segundo os datos achegados, o apoio da Deputación de Pontevedra foi determinante para o desenvolvemento desta iniciativa ao longo das súas sucesivas edicións, o que permitiu consolidar unha rede de exhibición que xa acumula máis de 6.300 espectadores, supera as 140 proxeccións e tivo presenza en máis de vinte localidades da provincia. Calcúlase que o ciclo chegou a un público potencial de máis de 170.000 habitantes, achegando o cinema galego a espazos culturais de concellos sen oferta de salas comerciais.

Dende a institución provincial subliñouse o interese en seguir respaldando propostas deste tipo, que contribúen a dar maior visibilidade ás producións galegas, ademais de agradecer a implicación dos concellos participantes e poñer en valor a colaboración institucional como peza clave para sacar adiante este tipo de iniciativas culturais.

Dende a Academia Galega do Audiovisual incidiuse na importancia de proxectos coma este para ampliar os circuítos de exhibición do cinema galego e achegalo ao público, facilitando o encontro entre as películas e os espectadores.

Unha rede que chega aos concellos

O Ciclo Mestre Mateo ten como obxectivo facilitar que a cidadanía poida acceder ás producións galegas máis destacadas, achegando as películas a espazos culturais próximos e contribuíndo a crear novos públicos. Nesta edición, as sesións desenvolveranse en diferentes equipamentos municipais e culturais.

En Oia, as proxeccións celebraranse no Centro Cultural de Pedornes. Na Estrada, o ciclo terá como sede os Cines da Estrada. En Mondariz, as sesións rotarán por distintos puntos do municipio, entre eles a Casa Cultural de Mouriscados, a Casa Cultural de Meirol, a Casa Cultural de Queimadelos, o Casino de Vilasobroso, a Escola de Redo en Vilar, o Teleclube de Riofrío, a Casa Cultural de Frades e a Escola de Lougares. En O Campo Lameiro, as proxeccións desenvolveranse no Centro Cultural Sobrino Buhigas.

O Ciclo Mestre Mateo naceu en 2022 impulsado pola Academia Galega do Audiovisual co apoio da Deputación de Pontevedra, e consolidouse como unha iniciativa de referencia para achegar cinema galego de calidade a localidades que carecen de salas comerciais, tecendo unha rede de exhibición en centros culturais, auditorios e bibliotecas de toda Galicia. Ao longo das súas distintas edicións, o ciclo contribuíu a facilitar o acceso a producións destacadas do audiovisual galego, superando as limitacións propias dos circuítos comerciais e reforzando o vínculo entre a cidadanía e o seu propio cinema.