O ciclo Orixe levará oito concertos a seis salas galegas ata marzo de 2027
O ciclo Orixe levará entre outubro de 2026 e marzo de 2027 un total de oito citas musicais a seis salas galegas, cunha programación que reunirá once artistas e grupos de diferentes estilos. A iniciativa, impulsada por Ernie Producciones, conta co apoio da Xunta de Galicia a través das subvencións destinadas á programación musical en salas privadas durante o bienio 2026-2027.
A programación arrincará este sábado, 10 de outubro, na sala Mardi Gras da Coruña, cun concerto compartido por Estrogenuinas e Agoraphobia. O ciclo continuará o 17 de outubro na Arca da Noe de Vilar de Santos, onde actuará Montedapena, e o día 24 na Sala Jagger de Lugo, cun concerto de Eladio y los Seres Queridos.
Xa en novembro, a programación chegará á Fábrica de Chocolate de Vigo o día 6, con Los Acebos e Dani Cornes, mentres que Monoulious DOP actuará o 20 de novembro en A Cofradía de Vilanova de Arousa.
Orixe retomará os concertos en febreiro
Despois da pausa de inverno, o ciclo volverá en febreiro de 2027. Capital Voskov actuará o día 5 en A Cofradía de Vilanova de Arousa e Taïn fará o propio o 12 de febreiro na Fábrica de Chocolate de Vigo.
A última cita será o 13 de marzo na sala Guión de Pontedeume, onde Carla Lourdes e Javier Lago serán os encargados de pechar a programación.
Apoio ás salas privadas e á música en directo
Orixe forma parte das nove programacións incluídas na liña de axudas da Xunta para salas privadas. A convocatoria conta cunha dotación total de 358.586 euros para o bienio 2026-2027 e permitirá desenvolver 141 concertos a cargo de 80 artistas e grupos en 16 espazos de Galicia.
A iniciativa busca así contribuír á programación de música en directo nas salas galegas e facilitar a celebración de concertos ao longo dos próximos meses.