O cineclub Valle-Inclán acolle unha escolma de películas da Filmoteca galega
Lugo, xunto a outras cidades da comunidade, acolle ao longo de maio unha escolma de filmes incluídos na programación estendida da Filmoteca de Galicia, dos que se realizarán proxeccións no cineclub Valle-Inclán. A finalidade é unha maior descentralización así como unha maior difusión entre o público.
Así, nos vindeiros días, o cineclub Valle-Inclán, de Lugo, proxectará o mércores 19 Dorothé na vila, de Alejandro Gándara e Olaia Tubío, e o día 24, Mi noche con Maud, filme integrado no ciclo Esenciais: Éric Rohmer. O 26 de maio exhibirase Linda, de Dorothy Davenport, e o 31, Chungking Express, de Wong Kar-wai.
Estes títulos súmanse aos xa exhibidos na primeira quincena do mes, como Pauline en la playa, Una niña, de Sébastien Lifshitz, La rodilla de Clara, de Eric Rohmer, e A media voz, de Patricia Pérez e Heidi Hassan, no cineclub Valle-Inclán.
A programación de películas en espazos alleos á Filmoteca de Galicia insírese na liña de apoio da Consellería de Cultura, Educación e Universidade ao labor de difusión cinematográfica de e creación de novos públicos que desenvolven diferentes entidades no ámbito local e autonómico. A iniciativa súmase, ademais, ao convenio xeral de colaboración asinado o pasado día 6 coa Federación Galega de Cineclubs, un acordo que garante a programación cinematográfica anual en 13 localidades.
A información cos títulos e os horarios das exhibicións previstas nestes espazos durante este mes poden consultarse na web da Filmoteca de Galicia.