O COAG acolle unha conferencia da directora do Museo Arqueolóxico Nacional sobre o presente e o futuro da institución
A sede da Delegación de Lugo do Colexio Oficial de Arquitectos de Galicia (COAG), na rúa Puro Cora, número 1, acolle hoxe, xoves 5 de novembro, unha conferencia de Isabel Izquierdo Peraile, directora do Museo Arqueolóxico Nacional (MAN). A sesión comezará ás 19:30 horas e a entrada será gratuíta, aínda que será necesario realizar unha inscrición previa.
Baixo o título 'El Museo Arqueológico Nacional: Tras la reforma integral, presente y futuro', a responsable da institución abordará a evolución do museo desde a súa fundación en 1867, a formación das súas coleccións e o papel que desempeña na conservación e difusión do patrimonio histórico. A charla servirá tamén para achegarse á celebración do seu 160 aniversario, que terá lugar en 2027.
Unha parte destacada da intervención estará dedicada á reforma integral executada entre 2008 e 2014, que supuxo unha transformación dos espazos internos, das zonas destinadas ao público e da exposición permanente. Os traballos incluíron a modernización dos equipamentos e servizos, a restauración da fachada histórica e a recuperación do xardín e do enreixado exterior. Izquierdo explicará tamén os retos actuais da institución, que desenvolve a súa actividade no marco do Plan Estratéxico 2024-2027.
Fundado por Isabel II en 1867, o Museo Arqueolóxico Nacional naceu co obxectivo de reunir nunha única institución coleccións de antigüidades que se atopaban dispersas, ofrecer unha visión da historia de España e achegar ao público as civilizacións do pasado. A súa creación estivo tamén vinculada á necesidade de protexer bens culturais ameazados por guerras, invasións e procesos de desamortización.
Desde os seus inicios, o museo ocupa o actual Palacio de Biblioteca e Museos Nacionais, no paseo do Prado-Recoletos de Madrid. O edificio, concibido en 1860 e rematado en 1892 tras varios proxectos arquitectónicos, foi adaptado coas últimas obras ás necesidades dunha institución que busca achegar o patrimonio histórico á sociedade e favorecer unha lectura crítica do pasado.