O comercio de alimentación volverá tomar as rúas da Coruña este domingo polo bloqueo do convenio
O conflito laboral no comercio de alimentación da provincia da Coruña volverá ás rúas este domingo, 20 de setembro, cunha nova manifestación provincial convocada por CCOO, CIG, UGT e USO ante a falta de avances na negociación do convenio colectivo.
A mobilización partirá ás 12.00 horas da parte traseira do Centro Comercial Catro Camiños, na Coruña. Os representantes sindicais atenderán os medios de comunicación ás 11.45 horas, antes do inicio da marcha.
A protesta chega despois de varios meses de negociacións e dun calendario de folgas e concentracións que non conseguiu desbloquear o acordo. O persoal do sector reclama melloras nas condicións laborais e salariais, mentres as organizacións sindicais denuncian que as propostas da patronal non permiten avanzar nas principais cuestións que están sobre a mesa.
A situación vén provocando mobilizacións desde hai meses. En xuño, o persoal do comercio de alimentación da provincia xa protagonizou varias xornadas de folga para reclamar avances no convenio. O conflito laboral chegou entón a afectar a supermercados e centros loxísticos de distintos puntos da provincia.
Durante o verán tamén se mantivo o calendario de protestas. En agosto, CCOO, CIG, UGT e USO convocaron novas xornadas de folga e unha manifestación na Coruña ante a ausencia de avances suficientes na mesa negociadora. A protesta incluíu tres novas xornadas de paro e unha manifestación na cidade.
As principais reivindicacións
Entre as demandas que sitúan os sindicatos no centro da negociación están a recuperación do poder adquisitivo, a redución da xornada anual, medidas que faciliten a conciliación da vida laboral e persoal e melloras nas condicións económicas e sociais do convenio.
A representación sindical sostén que as propostas presentadas pola patronal continúan sen dar resposta suficiente a estas cuestións. Pola súa banda, a Asociación de Supermercados, Autoservizos Maioristas e Distribuidores de Alimentación da Coruña (ASAC) defendeu durante o conflito que as propostas empresariais incluían incrementos salariais e medidas relacionadas co poder adquisitivo, os complementos, a promoción profesional e a conciliación. A asociación empresarial fixo pública esta posición tras unha mediación que terminou sen acordo.
O conflicto tamén tivo una vertente xudicial. En xullo, os sindicatos concentráronse ante o SMAC da Coruña despois de que Gadis reclamase 1,25 millóns de euros polos supostos perxuicios económicos derivados das folgas de San Xoán. O acto de conciliación terminou sen acordo.
Un novo capítulo das mobilizacións
A manifestación deste domingo supón un novo capítulo dun conflito que continúa aberto. Os sindicatos aseguran que manterán as mobilizacións mentres non se produzan avances que permitan pechar un acordo sobre o convenio.
Ademais, o calendario anunciado polas centrais inclúe novas xornadas de folga previstas para outubro. As organizacións sindicais xa avanzaran novas protestas e paros para os próximos meses ante a continuidade do bloqueo.
A convocatoria deste domingo está dirixida tanto aos cadros de persoal do sector como ás súas familias e ao conxunto da cidadanía. CCOO, CIG, UGT e USO agardan unha participación ampla na marcha, coa que pretenden reclamar a reactivación da negociación colectiva.