O Concello de Vigo destinará 1.350.000 euros ás axudas de emerxencia e bonotaxi en 2026
O Concello destinará en 2026 un total de 1.350.000 euros ás axudas de emerxencia social e ao programa bonotaxi, segundo anunciou este xoves o alcalde, Abel Caballero. A Xunta de Goberno aprobará o acordo na súa vindeira reunión.
En concreto, o programa contempla unha dotación de 1.300.000 euros para axudas de emerxencia social e outros 50.000 euros destinados a facilitar o transporte ás persoas con discapacidade a través do bonotaxi. Caballero subliñou que estas axudas céntranse en cubrir necesidades básicas como a vivenda, a alimentación e o pago de subministracións esenciais como a luz e a auga.
“O obxectivo é evitar desafiuzamentos e que as familias teñan dificultades para a súa alimentación ou non poidan pagar a luz e a auga”, afirmou o alcalde, quen destacou que este programa municipal permite previr cada ano ducias de desafiuzamentos de persoas que atravesan situacións económicas puntuais.
O rexedor lembrou ademais que as axudas de emerxencia do Concello son compatibles con outras prestacións de Política Social e coa Renda de Inclusión Social de Galicia (Risga), o que, ao seu xuízo, converte a Vigo “na cidade coa política social máis importante de España”.
Por outra banda, Caballero anunciou a reactivación, a partir deste xoves, do dispositivo de frío, destinado a atender ás persoas vulnerables que dormen na rúa durante os meses de inverno. Este dispositivo ofrece prazas no albergue municipal, no centro de Santa Cruz e en pensións e hostais, ademais de bebidas quentes e mantas para aquelas persoas que rexeitan acudir aos centros habilitados.
“O Concello conta cun albergue municipal que supón un investimento anual de 1.100.000 euros, ademais dos dispositivos de frío para atender ás persoas que máis o necesitan”, concluíu o alcalde.