Política

BNG reclama ao Goberno políticas ambiciosas de vivenda a comezar pola transferencia dos inmóbeis da SAREB para conformar unha bolsa de vivendas públicas e de alugueiro

O deputado do BNG no Congreso, Néstor Rego, exixiu esta mañá parar o desafiuzamento dunha familia en situación de vulnerabilidade que reside no edificio da Sareb situado na Praza do Asilo, número 5.

Néstor Rego, xunto cos concelleiros de Narón, Geno Carballeiro e Olalla Ledo, e distintas persoas afectadas das prácticas abusivas da SAREB, denunciaron a situación vivida por esta familia pendente da execución do lanzamento para o próximo sábado, mais tamén lembraron os casos doutras persoas expulsadas das súas casas baixo ameaza de desafiuzamento nese mesmo edificio e noutros propiedade da SAREB en Narón, así como tamén noutras vilas e cidades da Galiza.

“A entidade, de capital maioritariamente público, non supervisa nin inspecciona as vivendas, que son encomendadas a empresas intermediarias e quedou demostrado, realizan prácticas de intimidación para lograr o obxectivo dun maior rédito”, declara o deputado nacionalista, “a SAREB actúa irresponsabelmente ao se desentender e pretender expulsar as persoas inquilinas, familias vulnerábeis, con crianzas, sen alternativa de vivenda a un prezo accesíbel. Debe rectificar e retirar a orde de desafiuzamento”.

Velaí a situación na que están algunhas das persoas inquilinas deste inmóbel da Praza do Asilo. “Hai unha familia composta por unha muller coa súa nai e dous fillos menores, que conta con informe municipal de situación de vulnerabilidade económica e perceptora do salario social, Risga, que se enfrenta a constantes intentos de desaloxo”. Desde xaneiro deste ano, explicou Néstor Rego, “está sometida a un constante acoso por parte da inmobiliaria Gallega Directa 2018 S.L. para o abono dunhas mensualidades atrasadas cando segundo resolución xudicial do Tribunal de Instancia de Ferrol, xa era propiedade da Sareb nos meses relacionados coa débeda reclamada”.

O deputado do BNG sinalou que na mesma situación hai outra familia. Reclamou unha solución para estas familias que pasa “porque a Sareb faga un novo contrato de alugueiro social cos inquilinos afectados. Non valen escusas. A situación de vulnerabilidade das persoas afectadas está mais que demostrada e teñen dereito a vivir tranquilas e dignamente, sen estar constantemente perseguidas por unha inmobiliaria”.

Néstor Rego demandou ao Goberno que actúe con urxencia e paralice todos os desafiuzamentos de pisos en mans da Sareb. “Non se entende que mentres se anuncian decretos de urxencia para paralizar os desafiuzamentos até 2030, non se empece por prohibilos en inmóbeis que son de titularidade pública”.

Así mesmo, o deputado do nacionalista manifestou que “o BNG seguirá a reclamar que se proceda a transferir o parque inmobiliario da SAREB na Galiza para integralo nunha bolsa de vivenda pública e para o alugueiro social” declara Néstor Rego, “mais tamén que se impulsen medidas para frear o medre dos prezos topando os alugueiros ou os xuros das hipotecas, impedindo a especulación inmobiliaria e modificando a lexislación vixente para protexer ás persoas inquilinas” finda Néstor Rego.