O escritor ourensán Fernández Naval inicia en Ourense unha xira de presentacións do seu novo libro “Val tan doce e sombrío”
O escritor Francisco X. Fernández Naval (Ourense, 1956) presenta o seu novo poemario, Val tan doce e sombrío, editado por Kalandraka dentro da colección Tambo, unha obra na que o autor transforma nun exercicio literario unha vivencia persoal vinculada á dor e aos coidados.
O libro nace dunha etapa de varios anos na que o escritor acompañou o proceso de coidado da súa nai, unha experiencia que describe como profundamente marcada pola enfermidade e o deterioro cognitivo. A partir dese contexto, Fernández Naval constrúe unha proposta poética na que, segundo explica, a presenza da enfermidade convive coa persistencia do amor e coa conexión coa natureza, que atravesa o conxunto dos textos.
O autor cualifica esta obra como un poemario de acompañamento, no que a experiencia vital se traduce nunha escrita que combina memoria, emoción e reflexión.
Tras esta publicación, Fernández Naval inicia unha xira de presentacións por Galicia que arranca en Ourense, o 16 de xuño ás 19:30 horas na libraría Tanco e continuará en cidades como A Coruña e Pontevedra ao longo do mes de xuño.