O Festival 27373 de Begonte celebrará a súa 14ª edición cun cartel que combina tradición, rock e música infantil
O Festival 27373 de música en galego volverá reunir o próximo 8 de agosto no Clube Fluvial de Begonte unha ampla representación da escena musical galega coa celebración da súa décimo cuarta edición. A organización presentou a programación dun evento que combinará música tradicional, propostas para o público infantil e concertos de rock e folk, mantendo a súa aposta pola promoción da cultura e da música en galego.
A xornada comezará ás 13.45 horas cunha sesión vermú amenizada polo grupo O Son do Pucheiro, dentro do programa Tradigalu da Vicepresidencia da Deputación de Lugo. O público poderá degustar, ademais, un novo lote de cervexas artesás elaboradas en colaboración con Cervexa Artesá Aloumiña, entre as que volverán estar as variedades exclusivas do festival 27 de laranxa, 27 de lima e a Ñeipa.
A programación continuará pola tarde cun aberto de billarda ás 17.00 horas e un campionato de cimbrón ás 18.00. Media hora despois será a quenda de Pitusa Semifusa, o proxecto musical e didáctico liderado pola ourensá Olga Brañas, que ofrecerá un espectáculo pensado para achegar a música e os instrumentos ao público infantil a través dun formato participativo e lúdico. A actuación chega ao festival coa colaboración do Concello de Begonte e da Axencia Galega das Industrias Culturais (Agadic).
Os concertos nocturnos arrancarán con Sun Iou, a banda encabezada por Tamara Martínez, que presentará o seu novo traballo, Egos. O grupo destaca por fusionar rock, punk, electrónica e tradición galega con letras de carácter reivindicativo e comprometido.
O cartel complétase coa actuación de Axeigo, formación de música tradicional galega que regresa ao festival máis dunha década despois da súa participación nas primeiras foliadas organizadas polo colectivo. A banda presentará o seu último traballo discográfico, Recuncando, nunha actuación marcada pola combinación de tradición e renovación musical.
O peche da décimo cuarta edición correrá a cargo de The Lelli Kelly's, grupo do Morrazo que levará ao escenario o seu estilo baseado no rock clásico, o punk e o rhythm & blues, cun directo caracterizado pola enerxía e a intensidade.
O Festival 27373 manterá tamén nesta edición a súa entrada de balde e ofrecerá zona de acampada libre, consolidándose como unha das citas culturais e musicais de referencia do verán na comarca lucense e como un escaparate para a creación musical en galego.