O focense Nico Martínez, premiado pola súa superación tras vencer un cancro infantil
O focense Nico Martínez Adega vén de recibir un novo recoñecemento que vai máis alá dos seus éxitos deportivos. O padexeiro foi un dos galardoados nos XIV Premios ECO, organizados pola Fundación ECO (Excelencia e Calidade en Oncoloxía), que distinguen o labor e a traxectoria de persoas e institucións vinculadas á investigación, divulgación, asistencia e atención fronte ao cancro.
Nico Martínez recibiu o Premio Extraordinario á Superación e Exemplo de Vida fronte ao Cancro, un galardón que compartiu ex aequo coa tamén deportista Daniela Guillén. A distinción pon o foco na súa historia persoal, na maneira na que afrontou a enfermidade desde moi novo e no camiño que posteriormente o levou ata a elite do piragüismo adaptado.
A entrega tivo lugar na Real Academia Nacional de Medicina de España, nun acto que reuniu profesionais sanitarios, investigadores, autoridades e representantes relacionados co ámbito da oncoloxía.
A historia de Nico Martínez está marcada por un diagnóstico que chegou cando apenas tiña sete anos. Un osteosarcoma no xeonllo dereito obrigouno a afrontar un longo proceso médico que incluíu 54 ciclos de quimioterapia e 15 operacións, ademais da implantación de diferentes próteses.
Superar o cancro non significou, con todo, recuperar inmediatamente a vida que coñecía. Despois da enfermidade dixéronlle que tería que abandonar o deporte, unha realidade que non estaba disposto a aceptar. Durante anos buscou unha disciplina que lle permitise volver adestrar, competir e sentirse capaz ata atopar no piragüismo adaptado a súa oportunidade.
Aquela decisión acabou levándoo ao máis alto. O deportista de Foz conseguiu proclamarse campión do mundo e de Europa de maratón na categoría KL3 e formar parte da selección española de paracanoe. Na actualidade continúa traballando tamén na distancia dos 200 metros cun obxectivo especialmente ambicioso: conseguir representar a España nos Xogos Paralímpicos de Los Ángeles 2028.
A traxectoria de Nico Martínez no piragüismo mundial
Pero a súa historia non queda na competición. Nico Martínez compaxina a carreira deportiva cos seus estudos de Enxeñaría Informática e co seu labor como conferenciante, unha faceta na que comparte a súa experiencia para trasladar unha mensaxe centrada en pasar á acción ante as dificultades.
Nas súas intervencións fala de resiliencia, identidade, inclusión ou xestión da presión, pero faino desde unha perspectiva baseada na capacidade, na disciplina e tamén no humor. A experiencia acumulada desde aquel diagnóstico na infancia converteuse así nunha ferramenta para conectar con outras persoas e demostrar que unha enfermidade non ten por que determinar os límites do futuro.
Precisamente estes días Nico Martínez participou tamén na III Xornada de Portas Abertas con motivo do Día Nacional contra o Sarcoma, celebrada no Hospital Universitario La Paz de Madrid. O focense formou parte dunha mesa redonda xunto a outros pacientes e familiares para abordar como cambia a vida tras recibir un diagnóstico de cancro, durante o tratamento e, especialmente, cando chega o momento de afrontar a etapa posterior á enfermidade.
A súa intervención permitiulle compartir unha experiencia que coñece desde a infancia: primeiro, a loita contra o osteosarcoma; despois, a necesidade de adaptarse a unha nova realidade e, finalmente, a procura dunha alternativa que lle permitise manter o deporte como parte esencial da súa vida.
A xornada celebrouse coincidindo co Día Nacional do Osteosarcoma, que se conmemora cada 20 de setembro, e dentro do Mes de Concienciación sobre o Cancro Infantil.
O Premio ECO súmase agora a unha traxectoria na que Nico Martínez converteu o deporte nunha forma de reconstruír a súa vida despois do cancro. O que comezou como unha procura para volver sentirse deportista acabou conducindo ao focense ata títulos mundiais e europeos, á selección española e a un novo desafío no horizonte: intentar chegar aos Xogos Paralímpicos.
⇒REPORTAXE