O Goberno inviste na provincia de Pontevedra 1,8 millóns de euros para sete novas infraestruturas de recarga de vehículos
O subdelegado do Goberno en Pontevedra, Abel Losada, destacou hoxe a concesión de case 1,8 millóns de euros á provincia no marco da primeira convocatoria do programa MOVES Corredores de Recarga, impulsado polo Ministerio para a Transición Ecolóxica e o Reto Demográfico (MITECO) e financiado con fondos europeos NextGenerationEU do Plan de Recuperación, Transformación e Resiliencia.
O investimento permitirá executar sete novas actuacións destinadas a ampliar a rede pública de recarga rápida e ultrarrápida para vehículos eléctricos na provincia, reforzando a infraestrutura dispoñible nos principais corredores viarios e facilitando os desprazamentos en mobilidade eléctrica.
Abel Losada salientou que estas actuacións "contribúen a facer máis accesible e fiable a mobilidade eléctrica, favorecendo a transición cara a un modelo de transporte máis sostible e impulsando investimentos que melloran os servizos á cidadanía". O subdelegado subliñou que "o compromiso do Goberno coa descarbonización tradúcese en actuacións concretas que reforzan a rede pública de recarga e facilitan que cada vez máis persoas poidan apostar polo vehículo eléctrico con garantías".
A convocatoria MOVES Corredores de Recarga permitirá desenvolver sete actuacións na provincia de Pontevedra, distribuídas entre os municipios de Poio, Vigo, Mos, Caldas de Reis, A Cañiza e Pontevedra, onde se executarán novas estacións de recarga rápida e ultrarrápida, así como novos puntos de recarga de acceso público. En concreto, financiaranse unha estación de carga ultrarrápida en Poio; unha nova estación de recarga no aparcadoiro do Aeroporto de Vigo; unha estación na A-55, ao seu paso por Mos; outra na AP-9, en Caldas de Reis; unha nova infraestrutura en A Cañiza; puntos de recarga no Carrefour de Salcedo e unha estación no Hotel Duerming París, ambas en Pontevedra.
Estas actuacións forman parte da resolución definitiva do programa MOVES Corredores de Recarga, que destina 97 millóns de euros para financiar 341 proxectos en todo o país co obxectivo de ampliar a rede de infraestrutura de recarga de acceso público ao longo da rede transeuropea de estradas. Galicia sitúase como a terceira comunidade autónoma con maior número de proxectos aprobados, só por detrás de Andalucía e Castela-A Mancha.
Os proxectos seleccionados permitirán incorporar 2.674 novos puntos de recarga en España, reforzando a cobertura da rede pública e contribuíndo ao cumprimento dos obxectivos europeos en materia de mobilidade sostible.
Desde a posta en marcha do ecosistema MOVES, o Goberno mobilizou xa máis de 3.000 millóns de euros para impulsar a mobilidade eléctrica en España, permitindo a adquisición de máis de 204.900 vehículos eléctricos, a instalación de 160.000 puntos de recarga e o desenvolvemento de proxectos innovadores destinados a acelerar a descarbonización do transporte.