O MITECO adxudica o concurso de transición xusta de Meirama e tramita o das Pontes
O Ministerio para a Transición Ecolóxica e o Reto Demográfico (MITECO), a través do Instituto para a Transición Xusta (ITJ), adxudicou a Coventina Renovables os 408 MW de capacidade de acceso á rede eléctrica do nó de transición xusta de Meirama 220 kV para o desenvolvemento dunha central hidroeléctrica reversible. O anuncio foi realizado na Coruña pola directora do ITJ, Judit Carreras, acompañada polo delegado do Goberno en Galicia, Pedro Blanco.
O proxecto leva asociado un investimento superior aos 400 millóns de euros e a creación de máis de 1.000 empregos equivalentes a tempo completo anualizados durante un período mínimo de dez anos. A resolución xa foi notificada á empresa adxudicataria e será publicada nos próximos días no Boletín Oficial do Estado.
No acto participaron tamén o alcalde de Cerceda, Juan Manuel Rodríguez; o subdelegado do Goberno na Coruña, Julio Abalde; e representantes de Coventina Renovables.
O concurso, impulsado polo ITJ, desenvolveuse mediante un procedemento de concorrencia competitiva que prioriza aqueles proxectos capaces de maximizar os beneficios socioeconómicos para os territorios afectados polo peche de centrais térmicas, ao tempo que minimizan o impacto ambiental. Neste caso, a actuación está vinculada á zona de transición xusta de Meirama, integrada polos concellos de Carral, Cerceda, A Laracha, Ordes e Tordoia.
Segundo os compromisos adquiridos pola empresa, a iniciativa permitirá crear arredor de 180 postos de traballo directos na zona mediante a operación e mantemento da central hidroeléctrica reversible, o impulso a novos proxectos empresariais e actuacións de conservación e mellora ambiental na contorna do lago das Encrobas.
Ademais, Coventina Renovables comprométese a impartir programas de formación profesional para 450 residentes da comarca, cun total de 67.500 horas formativas, así como a instalar 2 MW de autoconsumo fotovoltaico destinados a vivendas e edificios municipais.
A compañía depositou unha garantía de 52,8 millóns de euros para asegurar o cumprimento dos compromisos sociais e ambientais recollidos na súa proposta. O proxecto deberá superar aínda os correspondentes trámites administrativos e ambientais para a súa execución.
A iniciativa foi tamén proposta como beneficiaria dunha axuda de 30 millóns de euros da liña estatal destinada a proxectos innovadores de almacenamento enerxético mediante bombeo reversible, xestionada polo Instituto para a Diversificación e o Aforro da Enerxía (IDAE).
O Goberno central destacou que esta actuación se suma ao conxunto de medidas despregadas desde 2019 nas zonas de transición xusta de Galicia. Neste período, o MITECO concedeu máis de 183 millóns de euros para un total de 59 proxectos localizados nos ámbitos de Meirama e As Pontes, a través de diferentes programas de apoio empresarial, infraestruturas municipais e iniciativas vinculadas ás enerxías renovables e ao hidróxeno verde.
Precisamente, o Executivo confirmou tamén que xa se iniciou a tramitación do futuro concurso de transición xusta de Maciñeira, no concello das As Pontes, unha actuación chamada a converterse nun novo paso no proceso de reindustrialización e transformación enerxica da comarca tras o peche da central térmica pontesa.