O Morriña Festival arranca na Coruña coa edición máis multitudinaria da súa historia
A Coruña deu este venres o pistoletazo de saída ao Morriña Festival 2026, que celebra a súa edición máis ambiciosa ata a data. Máis de 40.000 persoas pasarán polo recinto instalado no Porto da Coruña entre este venres e o domingo, nunha cita que consolida o evento como o maior festival musical de pago da cidade e un dos referentes do norte de España.
Coincidindo co inicio da programación, esta mañá tivo lugar a visita institucional ao recinto, encabezada pola alcaldesa da Coruña, Inés Rey. No percorrido tamén participaron o comisario do Xacobeo 2027, Marcos Gómez Román; o concelleiro de Cultura e Turismo, Gonzalo Castro; Helena Pereiro, en representación de Estrella Galicia; o presidente da Autoridade Portuaria da Coruña, Martín Fernández Prado; e o director de Comunicación de Bring The Noise, empresa promotora do festival, Esteban Girón.
A presenza de representantes das distintas institucións e entidades colaboradoras puxo de relevo o apoio a un festival que, desde a súa chegada á cidade en 2022, medrou de forma continuada ata converterse nun dos principais eventos culturais de Galicia.
Nesta sexta edición, o cartel reúne artistas de proxección internacional como Myke Towers, Manuel Turizo, Young Miko, Paul Kalkbrenner e Juanes. A programación complétase con nomes destacados do panorama estatal, entre eles Marlena e Belén Aguilera, ademais dunha ampla representación da escena musical galega con artistas como Hard GZ e 9Louro.
A organización destaca tamén o impacto que o festival ten na actividade económica da cidade, especialmente nos sectores hoteleiro, hostaleiro e comercial, ao tempo que contribúe a reforzar a proxección da Coruña como destino para a celebración de grandes eventos culturais.
Co recinto xa preparado para recibir aos asistentes e unha produción adaptada ás dimensións do evento, Morriña Festival afronta unha nova edición coa previsión de bater o seu récord de público e consolidar a súa posición entre os grandes festivais musicais de España.