O Museo de Lugo recibirá seis novas obras do Museo do Prado en 2027
O Museo Provincial de Lugo e o Museo do Prado amplían os seus vínculos de colaboración cun contrato de comodato que traerá á exposición permanente da institución lucense seis obras de distintas épocas e estilos artísticos.
Trátase dos cadros Susana y los viejos, de Luca Giordano, Camino de la Fuente de Alfredo Souto Cuero, dos retratos José Tomás Salvany e Matilde López Dóriga de Federico de Madrazo, Rincón de Jardín con perrito de Tomás Hiepes e Paisaje de Serafín Avendaño Martínez.
A proposta de contrato aprobouse esta mañá no pleno provincial, iniciando o procedemento administrativo que permitirá o depósito das obras, previsto para o ano 2027. Segundo se recolle no propio contrato, de forma previa, realizaranse procedementos técnicos de control do estado de conservación e restauración das pezas que sexa precisa nos talleres do Museo do Prado.
A iniciativa encádrase no programa El Prado Extendido que desenvolve a institución estatal para reforzar a visibilidade das obras das súas coleccións. Súmase a outros programas como “El arte que conecta”, que en 2024 trouxo ao Museo Provincial de Lugo o cadro “Sibila” de Velázquez.
O Museo Provincial de Lugo conta xa 30 obras das coleccións do Museo do Prado en depósito, fundamentalmente pintura, entre elas, Retrato de Elsie Woodbury Brown de Raimundo de Madrazo e Encarnación Rambaud, de Federico de Madrazo, que poden verse na sala romántica -Sala 21 -, xunto coa colección de artes decorativas.