O Museo Provincial de Lugo incorpora aos seus fondos a escultura 'Esfera azul', de Elena Colmeiro

A obra da artista galega, de dous metros de altura e máis de dous metros de ancho, pode visitarse desde hoxe na primeira planta do museo, preto da sección de escultura galega
escultura Esfera Azul de Elena Colmeiro Museo Lugo
20 Nov 2026

O Museo Provincial de Lugo acaba de incorporar aos seus fondos a escultura 'Esfera azul', de Elena Colmeiro (Silleda, 1932-Madrid, 2021), unha das figuras máis destacadas da arte galega contemporánea e referente no uso creativo da cerámica. A peza, doada ao museo polo fillo da artista, pode verse desde hoxe na primeira planta do edificio, preto da sección de escultura galega.

A obra, de gran presenza física e visual, ten unhas dimensións de 200 x 202 x 31 centímetros e pasa a integrarse no discurso expositivo estable do museo, nun espazo singular do edificio. A súa incorporación supón ampliar a representación da creación artística contemporánea galega e, en particular, das mulleres artistas nas coleccións da institución.

A directora do Museo Provincial, Aurelia Balseiro, destacou a importancia desta incorporación, que reflicte a mestría técnica e a dimensión conceptual da obra de Elena Colmeiro. Pola súa banda, a deputada de Cultura, Iria Castro, agradeceu a xenerosidade e a confianza da familia Colmeiro, cuxa doazón permite seguir enriquecendo os fondos museísticos.

Con esta incorporación, o Museo Provincial continúa a liña de adquisición e recepción de obras de mulleres artistas galegas desenvolvida nos últimos anos, que permitiu ampliar as coleccións con pezas de creadoras como Soledad Penalta, Paula Noya e Ruth Lodeiro.

A relación de Elena Colmeiro co museo vai máis alá desta nova incorporación. A artista xa doara á institución o cadro 'Vista de Lugo coa muralla', realizado polo seu pai, Manuel Colmeiro, que actualmente se exhibe na sala 14.

1.5834448337555