O Outono de Jazz regresa a Pontevedra con catro concertos ao aire libre durante decembro
O Outono de Jazz regresa esta fin de semana a Pontevedra cun programa renovado que traerá á cidade algunhas das propostas máis destacadas do jazz galego actual.
A concelleira Anabel Gulías, acompañada de Luis Carballo, do Seminario Permanente de Jazz, presentou unha edición especial que celebra o 25º aniversario do ciclo, recuperando o seu nome orixinal.
Os concertos terán lugar os días 6, 7, 13 e 14 de decembro ás 12:00 horas na Praza da Peregrina, e en caso de choiva desprazaranse ao palco da música da Alameda. O obxectivo é achegar a música á rúa e dinamizar o centro da cidade durante os fins de semana previos ao Nadal.
PROGRAMA
O sábado 6 de decembro será a quenda do Pablo Patiño Cuarteto ‘Quoma’, un proxecto encabezado polo contrabaixista e compositor vilagarcián Pablo Patiño. O grupo aposta por unha estética que fusiona tradición e experimentación, cunha personalidade sonora claramente recoñecible. Patiño, activo internacionalmente, é valorado como unha das voces máis influentes da súa xeración. A formación complétase con Pablo Hernández ao saxo alto, Javier Gdejazz á trompeta e Esteban Lavigne á batería.
O domingo 7 continuará o programa co Xurxo Estévez Trío, liderado polo contrabaixista de Cotobade. Estévez compartirá escenario con Guillermo Guerrero e Miguel Fernández nun espectáculo dinámico e cheo de frescura. O seu repertorio percorre estándares clásicos, blues, composicións contemporáneas e creacións propias, sempre cunha clara pegada do jazz tradicional. A formación reúne a Xurxo Estévez no contrabaixo, Guillermo Guerrero na guitarra e Miguel Fernández na batería.
A segunda fin de semana abrirase o sábado 13 co Sunil López Trío ‘Smoke gets in your eyes’. O pianista vigués, unha das novas figuras do jazz estatal, presentará o seu primeiro traballo discográfico, editado por Fresh Sound New Talent. O álbum destaca polo seu lirismo e pola delicadeza melódica, e o concerto incluirá tanto pezas do disco como novos temas. Xunto a López estarán Alex Touceda no contrabaixo e Chus Pazos na batería.
O ciclo pechará o domingo 14 con Gloria Pavía & Rafa Morales, un dúo que propón unha experiencia sonora íntima e profundamente creativa. Baseada en composicións propias, a proposta articúlase arredor do diálogo entre a voz de Gloria Pavía e o baixo eléctrico de Rafa Morales, alternando momentos de intensidade con pasaxes máis delicadas.