Sindicatos

O comité intercentros acusa á empresa de bloquear as negociacións e non descarta convocar unha folga se non hai avances nas próximas semanas

Traballadores e traballadoras de Viaqua protagonizaron este xoves concentracións en Fene, Santiago de Compostela, Pontevedra e Ourense para esixir a consecución dun convenio colectivo digno e denunciar o que consideran un bloqueo das negociacións por parte da dirección de Veolia-Viaqua. A compañía presta o servizo de abastecemento e xestión da auga en arredor de 50 concellos galegos, dando cobertura a unha poboación próxima ás 750.000 persoas.

As protestas, convocadas polo comité intercentros, desenvolvéronse diante de distintos concellos e das instalacións da empresa, co obxectivo de incrementar a presión sobre a dirección para que retome unhas negociacións que, segundo a representación sindical, permanecen practicamente paralizadas.

O comité asegura que, malia os intentos realizados para achegar posturas durante a reunión mantida o pasado 1 de xuño, apenas se rexistraron avances en varios puntos do convenio. Os representantes do persoal sosteñen que a empresa continúa rexeitando melloras salariais alegando que poderían afectar á súa competitividade nos procesos de contratación pública.

Desde a parte social consideran “inaceptable” esta argumentación, especialmente tratándose dunha multinacional como Veolia. Ademais, sinalan que os salarios actuais do persoal non superan as táboas medias do sector e que cada vez se aproximan máis ás condicións establecidas no convenio estatal.

Os sindicatos tamén critican que a empresa estea trasladando mensaxes de incerteza sobre o futuro das concesións e da actividade, mentres prolonga o proceso negociador. Ao seu xuízo, esta situación está a provocar unha perda continuada de poder adquisitivo entre os traballadores e traballadoras.

Entre as principais demandas do persoal figuran o mantemento da xubilación parcial, a recuperación do poder adquisitivo mediante incrementos salariais vinculados ao IPC, a equiparación das condicións retributivas entre áreas de actividade, melloras para o persoal administrativo, un aumento das compensacións por gardas e traballos en condicións especiais, así como unha redución da xornada laboral.

Estas reivindicacións foron ratificadas por unanimidade nunha asemblea de delegados e delegadas celebrada o pasado 3 de xuño, na que tamén se acordou intensificar as mobilizacións ante a falta de avances nas conversas coa empresa.

O comité intercentros asegura que continúa apostando polo diálogo e pola negociación como vía para alcanzar un acordo, pero advirte de que manterá as protestas durante o mes de xuño se a dirección non modifica a súa posición. Neste escenario, a representación sindical non descarta convocar unha xornada de folga a finais de mes.

Finalmente, os representantes do persoal agradeceron a participación e implicación demostrada polos traballadores e traballadoras nas mobilizacións desenvolvidas nas últimas semanas e apelaron á unidade para lograr un convenio que mellore as condicións laborais e salariais de todo o colectivo.