O persoal lingüista da Xunta péchase en San Caetano para reclamar negociación e máis medios
O persoal lingüista da Xunta de Galicia pechouse este luns nas instalacións de San Caetano para denunciar a falta de avances nas negociacións coa Administración e reclamar información sobre as cargas de traballo e a actividade que desenvolve o colectivo. A protesta foi convocada pola CIG-Administración Autonómica, que acusa a Xunta de manter bloqueada unha negociación efectiva ao non facilitar os datos necesarios sobre o funcionamento do servizo.
As negociacións iniciadas o pasado 8 de setembro non permitiron, segundo a organización sindical, alcanzar acordos e desembocaron nunha nova proposta de convenio presentada este 5 de outubro. A CIG considera que o documento non resolve a situación dun colectivo maioritariamente feminino e que, segundo lembra, leva anos protagonizando conflitos laborais que chegaron aos tribunais e obrigaron a Administración a recoñecer o vínculo laboral das persoas afectadas.
A organización denuncia que a Consellería de Cultura, Lingua e Xuventude pretende manter unhas condicións de precariedade baseadas en xornadas de media duración e contratos limitados a sete meses ao ano para desenvolver tarefas de titorización, formación e avaliación dos cursos Celga e de linguaxe administrativa e xurídica galega.
Segundo a CIG, a relación de postos de traballo contempla 18 prazas, das que actualmente só nove están ocupadas polas persoas titulares. A distribución é tamén desigual territorialmente, con 15 postos na Coruña, un en Lugo, dous en Pontevedra e ningún en Ourense. O sindicato critica que a Administración aínda non publicou a listaxe complementaria necesaria para cubrir todos os postos fixos nin creou unha listaxe de substitucións.
A central sindical asegura ademais que desde o pasado 1 de setembro a carga de traballo do persoal se duplicou sen que se producise un aumento proporcional da xornada. Tamén cuestiona que estes empregados públicos estean baixo a coordinación dunha persoa allea á Administración.
Para a CIG, o volume de traballo que soporta este colectivo ten un carácter estrutural e non responde a unha situación puntual. Como exemplo, sinala que ao longo do ano se encargan funcións similares a persoal colaborador, entre o que se atopa profesorado das escolas oficiais de idiomas, docentes de secundaria ou empregados da propia Administración que xa desempeñan a súa actividade a xornada completa. O sindicato reclama maior transparencia sobre os criterios de selección, as retribucións e os custos asociados a estas colaboracións.
A organización sindical tamén alerta da diferenza existente entre a oferta de formación en galego e a demanda real. Segundo os seus datos, esta situación mantense ano tras ano sen que a Xunta adopte medidas suficientes para corrixila, nun contexto que a CIG cualifica de emerxencia lingüística.
Os cursos de linguaxe administrativa e xurídica galega son, segundo a central, un exemplo desta situación. En 2026, a Escola Galega de Administración Pública convocou, mediante un convenio coa Secretaría Xeral da Lingua, 1.200 prazas para estas formacións, fronte ás 5.650 solicitudes recibidas. Isto supón, segundo os datos achegados polo sindicato, que o 78,76% da demanda quedou sen atender.
A CIG sinala ademais que parte da formación se canaliza mediante convenios con entidades privadas, con condicións de acceso restrinxidas en función da titulación ou da colexiación e con matrículas que poden chegar aos 400 euros.
Ante esta situación, o sindicato reclama que se fagan públicos os datos completos da actividade, unha negociación efectiva, postos a xornada completa durante os doce meses do ano, o reforzo do persoal e unha oferta suficiente de formación pública e gratuíta.
A CIG-Administración Autonómica advirte de que continuará coas mobilizacións e coas medidas que considere necesarias se non se producen avances. A organización critica que a Xunta defenda publicamente o seu compromiso coa lingua galega mentres, segundo denuncia, mantén en condicións precarias o persoal encargado de impartir formación lingüística e deixa sen cubrir unha parte importante da demanda de capacitación do propio persoal empregado público.