O PP reclama no Senado que a balneoterapia se inclúa na carteira do Sistema Nacional de Saúde
Os senadores ourensáns do Partido Popular rexistraron unha moción na Comisión de Sanidade coa que solicitan que os tratamentos de balneoterapia se incorporen á carteira común de servizos do Sistema Nacional de Saúde (SNS). A iniciativa está impulsada polos senadores José Manuel Baltar, María del Carmen Leyte, Francisco José Fernández e Rosa María Sánchez Gándara, xunto ao portavoz de Sanidade do grupo popular na Cámara alta, Enrique Ruíz, e a portavoz Alicia García.
O texto defende a incorporación destes tratamentos ao sistema público de saúde baseándose no seu impacto sanitario e social, e sinala a existencia de “evidencia científica suficiente” para avalar a súa utilidade.
Entre os argumentos expostos, os senadores destacan que a balneoterapia podería mellorar a calidade de vida de pacientes con enfermidades crónicas e pluripatolóxicas, reducir o consumo de medicamentos e diminuír os tempos de baixa laboral ou incapacidade temporal. Tamén apuntan a un posible aforro no sistema sanitario ao reducir consultas e tratamentos reiterados en atención primaria e especializada, así como o seu papel na prevención de enfermidades e no envellecemento saudable.
A proposta tamén incide na dimensión territorial do termalismo. Segundo o PP, a inclusión destes tratamentos no SNS actuaría como un motor económico para o rural e para zonas afectadas polo despoboamento, onde se concentran moitos dos balnearios.
Neste sentido, a moción pon o foco na provincia de Ourense, á que define como un dos principais referentes termais de Europa e “Capital Termal de Galicia”, recoñecemento aprobado polo Parlamento galego en 2008. Os populares sosteñen que potenciar este sector tería un impacto directo no desenvolvemento económico e no benestar da poboación.
No plano comparativo, os senadores critican que España se sitúe entre os países europeos nos que estes tratamentos non están financiados polo sistema público, xunto a estados como Dinamarca, Estonia ou Países Baixos. Fronte a isto, lembran que países como Francia, Alemaña, Italia ou Portugal xa os integran nos seus sistemas sanitarios, e que noutros como Hungría ou República Checa contan con reembolso parcial ou total.
Para avanzar nesta proposta, o PP solicita que a Comisión de Sanidade inste ao Goberno a pedir un informe á Rede Española de Axencias de Avaliación de Tecnoloxías Sanitarias, co obxectivo de determinar as indicacións clínicas axeitadas en función da evidencia científica, a seguridade e a eficiencia.
Ademais, os populares consideran que esta medida permitiría reforzar a competitividade internacional dos balnearios españois e atraer pacientes doutros países europeos nos que estes tratamentos xa forman parte da cobertura sanitaria pública.