O Premio Hermann Künig á Hospitalidade recoñecerá en Santiago o labor de Accoglienza Pellegrina e César González Purroy
O Museo das Peregrinacións e de Santiago acollerá o vindeiro 20 de outubro, ás 13:00 horas, a entrega do Premio Hermann Künig á Hospitalidade, que nesta segunda edición recoñecerá o traballo da asociación italiana Accoglienza Pellegrina e do sacerdote español César González Purroy.
O galardón, promovido pola Asociación de Amigos do Camiño de Künig, distingue persoas e institucións que destacan pola súa dedicación á acollida nos itinerarios de peregrinación. A entidade busca así poñer en valor unha tarefa fundamental na experiencia xacobea, como é ofrecer atención e apoio a quen percorre os camiños cara a Compostela.
A primeira edición celebrouse na abadía de San Isidoro de León e distinguiu a organización Hospitaleros Voluntarios, que leva máis de trinta anos prestando acollida ás persoas peregrinas mediante un sistema de donativos. Ao longo destas décadas, a organización mobilizou milleiros de voluntarios procedentes de distintos continentes.
O premio foi creado en 2025 para promover os valores humanos vinculados á peregrinación, así como a difusión da cultura xacobea. Leva o nome de Hermann Künig, monxe alemán que no século XV escribiu unha das primeiras guías para peregrinos, concibida para facilitar o percorrido ata Santiago con información orientada á seguridade e á hospitalidade.
O recoñecemento consiste nunha placa de terracota elaborada pola ceramista Marta Rivera, que representa un peregrino medieval en ruta cara a Compostela, e nun diploma honorífico. A peza está inspirada nun gravado incluído na guía histórica de Künig, na edición publicada en Leipzig en 1521. O galardón non ten dotación económica, xa que pretende render homenaxe pública a persoas e entidades cuxo traballo hospitalario serve de exemplo para a sociedade.
O xurado está presidido polo filósofo Rogelio Blanco e conta con representantes dos ámbitos cultural e xacobeo. Entre os seus membros figuran Luis Celeiro, Ana Isabel Barreda, Xosé María García Palmeiro, José de Cora Paradela, Luis Gutiérrez Perrino, Maite Moreno Sanes, Manuel Alejandro González Flores e Tomás Álvarez. Apolinar Fernández Franco exerce como secretario de actas.
O Camiño de Künig atravesa distintos municipios da provincia de Lugo, entre eles As Nogais, Becerreá, Baralla, O Corgo e a propia cidade de Lugo, o que vincula esta ruta coa difusión do patrimonio e da tradición peregrina do territorio.