O programa ‘Ler Conta Moito’ ofrecerá máis de 600 actividades en preto de 200 concellos galegos
O programa de dinamización da lectura Ler Conta Moito chegará este ano a 194 concellos, cunha programación que superará as 600 actividades repartidas en 243 bibliotecas da Rede de Bibliotecas Públicas de Galicia. A resolución da convocatoria publicarase proximamente no Diario Oficial de Galicia cun investimento de 195.000 euros por parte da Consellería de Cultura, Lingua e Xuventude.
Os concellos poderán escoller actividades dun amplo catálogo dispoñible na web da Rede, que inclúe obradoiros creativos, contacontos, exposicións, propostas de música, maxia ou teatro. A Xunta financiará ata un 75% do custo total destas propostas culturais, reforzando así o seu compromiso coa promoción da lectura en todo o territorio galego.
Esta iniciativa está integrada nun investimento global de máis de 3 millóns de euros que o Goberno galego destina ao sector do libro e á promoción cultural, impulsando tamén librarías, feiras do libro, traducións, adquisición de novidades e apoio ás empresas editoriais.