Política

Julio Torrado alerta das listas de espera de máis de oito meses, da falta de profesionais e das deficiencias do modelo asistencial da Xunta

O portavoz de Sanidade do Grupo Parlamentario Socialista, Julio Torrado, denunciou este 10 de outubro, Día Mundial da Saúde Mental, as carencias que, ao seu xuízo, presenta a atención pública nesta área en Galicia. O deputado acusou á Xunta de non ofrecer unha resposta adecuada ás necesidades da poboación e resumiu a súa crítica cunha frase: "O modelo do PP é de aparcar persoas e non de coidalas".

Torrado lembrou que unha de cada sete persoas no mundo padece algún problema de saúde mental e apuntou que, segundo os datos que manexa, en Galicia a proporción é dunha de cada seis homes e unha de cada cinco mulleres. O socialista relacionou o aumento destes trastornos co estrés, a sobreexixencia e as características das relacións sociais actuais, e advertiu de que as mulleres se ven especialmente afectadas.

O parlamentario sinalou tamén que Galicia presenta un elevado consumo de psicofármacos e unha das taxas de suicidio máis altas de España. Para Torrado, esta situación evidencia as consecuencias da falta de atención histórica á saúde mental.

Entre as principais dificultades, o deputado destacou a escaseza de profesionais e as longas listas de espera. Segundo indicou, Galicia atópase entre as comunidades con peores ratios de especialistas por habitante, mentres que a demanda continúa medrando. As demoras poden chegar a un ano nalgunhas áreas sanitarias e a espera media galega supera os oito meses, asegurou.

"Isto implica que o dereito a ser atendido en saúde mental non está garantido de maneira real e efectiva no sistema público de saúde de Galicia", afirmou. Torrado vinculou esta falta de persoal á escasa formación de psicólogos clínicos sanitarios durante anos e criticou a falta de previsión para responder ás necesidades actuais.

O segundo ámbito de preocupación para o PSdeG é o modelo asistencial. A formación defende que a atención psicolóxica estea máis integrada na atención primaria, con equipos nos propios centros de saúde e terapias grupais que permitan achegar os servizos á cidadanía. Torrado cuestionou os obxectivos da Xunta en materia de contratación de psicólogos e considerou insuficiente a planificación prevista.

O portavoz socialista tamén reclamou máis recursos para as persoas con trastornos crónicos ou que precisan atención de longa duración. Neste punto, criticou a situación do Hospital Psiquiátrico de Conxo e lembrou o caso do sanatorio La Robleda, no Pino, centro concertado co Sergas no que, segundo indicou, o Defensor do Pobo constatou en 2024 que un paciente permanecera inmobilizado durante nove días.

Fronte a estas carencias, o PSdeG propón crear unha rede de centros pequenos, con persoal suficiente e integrados no territorio. Torrado resumiu as demandas socialistas en tres eixes: formar e contratar máis profesionais, achegar a atención á saúde mental á poboación a través da atención primaria e reforzar os coidados ás persoas que precisan apoio continuado.