O PSdeG esixe á Xunta que presente xa a programación do Xacobeo a dous meses do inicio do Ano Santo
A portavoz de Turismo do Grupo Socialista, Lara Méndez, denunciou que, a pouco máis de dous meses de que comece o Ano Santo 2027, o Goberno galego aínda non deu a coñecer a programación do 'Xacobeo'. A dirixente socialista realizou estas declaracións durante a comparecencia do director da Axencia de Turismo de Galicia no Parlamento, convocada para expoñer o balance da pasada tempada estival.
Méndez cuestionou que, cando apenas quedan semanas para a celebración, o Executivo autonómico non aclarase aspectos esenciais como que colaboracións están pechadas, en que puntos se vai actuar ou onde se desenvolverán as actividades previstas. Neste sentido, subliñou a responsabilidade que recae sobre a Xunta na organización deste evento, especialmente porque o 'Xacobeo' constitúe "case en exclusiva" a política turística que despraga actualmente o Goberno galego, logo de ter recortado 20 millóns de euros do orzamento destinado a esta materia e reducido en 10 millóns as transferencias aos concellos en concepto de turismo.
Doutra banda, a parlamentaria instou ao Executivo autonómico a priorizar a desestacionalización do turismo, ao entender que "hai marxe de mellora" para evitar que a actividade se concentre unicamente nos meses de verán. Para ilustrar este desequilibrio, puxo de relevo a notable diferenza na ocupación hoteleira entre a tempada alta e o resto do ano: mentres que en xaneiro esta se sitúa no 23,6 por cento, en agosto chega ao 68,2 por cento.
A socialista explicou que distribuír mellor a chegada de visitantes ao longo dos meses de menor actividade tería beneficios "a todos os niveis", tanto dende o punto de vista económico como en termos de estabilidade laboral e dunha maior presenza turística repartida por todo o territorio galego. Nas palabras de Méndez, "ter os hoteis cheos en agosto demostra que Galicia pode ser un destino atractivo, pero tamén demostra que non hai política de desestacionalización".
A portavoz socialista reclamou datos concretos sobre o impacto económico real que xera o turismo en Galicia, ao considerar insuficiente que a Xunta se limite a ofrecer porcentaxes de visitantes sen precisar canto gasto diario queda realmente no territorio. Así mesmo, solicitou información detallada sobre as repercusións do sector no emprego, incluíndo o tipo de contratos que se asinan, as horas traballadas, o salario medio e cantos deses postos de traballo se manteñen unha vez rematado o mes de setembro, para comprobar se realmente se traducen en emprego estable e de calidade.