Política

Lara Méndez avanza as iniciativas socialistas para a próxima semana e lembra que en xuño había 425.942 persoas agardando no Sergas

Sabe o presidente da Xunta cales son os principais problemas dos galegos e das galegas? Esa é a pregunta que o secretario xeral do PSdeG, José Ramón Gómez Besteiro, lle formulará a Alfonso Rueda no próximo Pleno do Parlamento. A viceportavoz parlamentaria socialista, Lara Méndez, avanzouna hoxe tras a Xunta de Portavoces e deixou caer unha hipótese. Quizais o problema de Rueda é que non sabe cales son eses problemas. Os socialistas, dixo, si os coñecemos. “E por iso os levaremos ao Pleno temas que afectan a vida dos cidadáns deste país”.

A vivenda vai de primeira. O Grupo Socialista defenderá unha proposición non de lei para que a Xunta faga públicos os datos do Censo de vivendas baleiras, regulado polo Decreto 17/2016. Méndez falou dunha medida "sinxela e razoable", necesaria para coordinarse mellor cos concellos e co resto de axentes que traballan en vivenda, e imprescindible se se quere despregar un Banco Público de Alugueiro ou mobilizar os pisos que hoxe están sen uso.

Non é unha proposta illada. Os socialistas tamén reclaman que a Xunta gaste o orzamento dispoñible no programa de acceso á vivenda e que exerza as súas competencias para declarar zonas de mercado tensionado. O Banco Público de Alugueiro, explicou Méndez, permitiría protexer ao mesmo tempo a inquilinos e propietarios, con prezos razoables e garantía de pago. O Pleno, engadiu, servirá para ver o compromiso real do PP co problema da vivenda e se está disposto a axudar a quen precisa un fogar ou segue da man dos fondos voitre.

425.942. Ese é o número de persoas que o 30 de xuño estaban nas listas de espera do Sergas, sumando cirurxía, consultas e probas diagnósticas. Son 47.193 máis que seis meses antes. "Son 425.942 motivos que demostran a incapacidade de xestión do conselleiro de Sanidade e a ineficacia do modelo do PP", resumiu a viceportavoz.

O Grupo Socialista presentará unha interpelación para que o conselleiro, Antonio Gómez Caamaño, explique que pensa facer para reducir esas cifras. Méndez lembrou que os datos oficiais nin sequera recollen toda a espera real, porque deixan fóra os pacientes que aínda non teñen cita fixada e as segundas e terceiras citas. E mesmo así, cos datos publicados con meses de atraso, as listas marcan un novo récord. "Xa que non quere falar por vontade propia sobre as listas de espera", o PSdeG obrigarao a facelo no Parlamento.

Sen saír da sanidade, os socialistas baixan ao concreto con Valdeorras. Unha pregunta oral levará ao conselleiro a responder polas eivas na atención sanitaria do distrito do Barco, que veñen denunciando a Plataforma Sanitaria de Valdeorras, os profesionais, as organizacións sindicais e a veciñanza.

Tamén haberá debate sobre drogas. A proposición non de lei do PSdeG pide que a Xunta colabore coas entidades que loitan contra a droga nunha campaña eficaz contra o consumo entre a mocidade, con máis convenios coas asociacións e plans de acción acordados cos concellos que inclúan medidas específicas para nenas e nenos. Para Méndez, a preocupación polo consumo entre a xente nova obriga a actuar con urxencia.

O transporte é o outro fronte. Unha pregunta urxente pedirá contas á Xunta polos problemas da liña de autobús entre A Coruña e Lugo, onde moitos viaxeiros, sobre todo estudantes nas fins de semana, quedan en terra porque o bus vai cheo. "É inaceptable que a única resposta diante dos problemas graves sexa que cando non hai praza teñan que agardar ao seguinte bus", criticou Méndez.

A axenda socialista péchase cunha pregunta para que o Goberno galego faga balance da fusión dos concellos de Cerdedo e Cotobade, dez anos despois, e diga se se cumpriron os obxectivos cos que se impulsou.