Política

Os socialistas piden complementar os máis de 27 millóns mobilizados polo Estado e reforzar as actuacións de restauración e prevención nas zonas afectadas

O PSdeG levará ao Parlamento galego unha serie de iniciativas para reclamar á Xunta a posta en marcha dun plan extraordinario destinado á recuperación dos territorios afectados polos incendios forestais de 2025. A formación considera necesario complementar os fondos mobilizados polo Estado e actuar sobre os montes queimados para reducir a erosión, estabilizar os solos e mellorar a súa capacidade de resposta ante os efectos do cambio climático.

A deputada socialista Carmen Rodríguez Dacosta sinalou que o Goberno central destinou máis de 27 millóns de euros a diferentes actuacións e liñas de axuda para reparar os danos provocados polos lumes, mentres critica que o Executivo autonómico aínda non presentase un programa específico de recuperación.

Entre os investimentos estatais, Dacosta destacou os 9,5 millóns de euros achegados polo Ministerio para a Transición Ecolóxica para desenvolver actuacións de restauración hidrolóxico-forestal. A esta cantidade súmase unha convocatoria de máis de 1,4 millóns de euros impulsada polo Ministerio de Política Territorial, que permite cubrir ata o 50 % do custo subvencionable de diferentes intervencións.

Esta última partida terá unha especial repercusión na provincia de Ourense, que concentra arredor do 90 % dos fondos e onde as axudas chegarán a 28 concellos especialmente castigados polos incendios.

Para os socialistas, estes recursos deben ir acompañados dun maior compromiso económico da Administración autonómica. O grupo parlamentario sostén que a recuperación integral das áreas afectadas non pode recaer unicamente sobre o Estado e lembra que a Xunta dispón das competencias en materia forestal.

Dacosta defendeu a necesidade de actuar antes de que se produzan novos episodios de incendios de grandes dimensións e incidiu na importancia de combinar a recuperación das zonas danadas coa prevención de futuros lumes.

A proposta que o PSdeG trasladará á Cámara galega pide que o plan autonómico complete as intervencións xa financiadas polo Goberno central e inclúa recursos para a restauración hidrolóxico-forestal e a reparación das infraestruturas públicas que sufriron danos.

Ademais, os socialistas reclaman que as medidas dean cobertura aos concellos, explotacións agrícolas e gandeiras, montes veciñais e particulares afectados, co obxectivo de facilitar a recuperación das perdas ocasionadas polos incendios.

“Recuperar hoxe o monte é tamén protexer o futuro de Galicia”, concluíu Dacosta, que considera estas actuacións fundamentais tanto para reparar os danos como para preparar o territorio ante futuros riscos ambientais.