O PSdeG reclama recuperar o Plan de Saúde con perspectiva de xénero e alerta dun sistema “aínda machista”
O portavoz de Sanidade do PSdeG, Julio Torrado, reclamou no Parlamento a recuperación do Plan de Saúde Integral con perspectiva de xénero impulsado polo goberno de Emilio Pérez Touriño e suprimido posteriormente polo PP.
Durante a súa intervención na Comisión de Sanidade, Torrado advertiu de que “seguimos sendo machistas” na atención sanitaria e denunciou unha “perspectiva deficitaria en materia de xénero” no sistema galego.
Un sistema sanitario androcéntrico
O deputado socialista alertou de que a atención sanitaria continúa centrada nun modelo androcéntrico, no que os síntomas das mulleres son infravalorados ou mal interpretados.
Neste sentido, puxo como exemplo o infarto agudo de miocardio, onde os mesmos síntomas reciben unha resposta máis rápida no caso dos homes, o que contribúe a que a mortalidade feminina sexa maior.
Tamén advertiu do fenómeno das “mulleres hiperfrecuentadoras”, que volven ao sistema sanitario de forma reiterada debido a diagnósticos incorrectos, moitas veces vinculados a problemas de saúde mental ou estrés.
Formación e cambios estruturais
Torrado reclamou a posta en marcha de medidas concretas como a formación continuada do persoal sanitario, a actualización de coñecementos e campañas de pedagoxía dirixidas á cidadanía.
Subliñou que “máis alá dunha xornada ou dunha conmemoración puntual”, é necesario reorientar o sistema sanitario cunha reflexión profunda que incorpore a perspectiva de xénero de forma real.
Desigualdades tamén na profesión
O parlamentario tamén puxo o foco nas desigualdades internas do sistema, lembrando que arredor do 60 % do persoal sanitario en Galicia son mulleres, pero só un 25 % ocupan postos de xefatura de servizo.
Ademais, criticou a falta de recursos na sanidade pública, sinalando que Galicia conta coa peor ratio de matronas do Estado e que as revisións xinecolóxicas acumulan atrasos significativos.
Torrado concluíu advertindo que os profesionais sanitarios “son moi bos, pero non son superheroes”, polo que resulta imprescindible reforzar o sistema con máis persoal e recursos.