Agro

O Sindicato Labrego Galego advirte de que, se non sobe o prezo do leite na próxima renovación de contratos, iniciará un calendario de mobilizacións

O sector lácteo galego afronta unha situación “crítica” polos fortes incrementos dos custos de produción, segundo alertou este martes o Sindicato Labrego Galego-Comisións Labregas (SLG-CCLL), que advirte de que o escenario pode empeorar nas próximas semanas. A organización sinala que, a dous meses das novas renovacións dos contratos, as industrias manteñen polo momento as súas ofertas, mentres os custos continúan aumentando, o que, ao seu xuízo, pon en perigo a continuidade das granxas galegas.

O SLG trasladou esta preocupación nunha rolda de prensa celebrada en Santiago de Compostela, na que participaron a súa secretaria xeral, María Ferreiro, gandeira en Curtis; o responsable do Sector do Leite, Manolo Villaverde, gandeiro de Forcarei, e a vicerresponsable do Sector Lácteo, Eva Rodríguez Rodríguez, gandeira de Cesuras.

María Ferreiro destacou que a situación é “alarmante para as granxas galegas”, cuxo número non deixa de diminuír, e cuestionou ata onde chegará esta caída se non se adoptan medidas que acheguen estabilidade ao sector. A secretaria xeral do SLG lembrou ademais que as explotacións galegas representan o 42% das granxas de leite do Estado español e salientou a súa importancia non só para a alimentación, senón tamén para o tecido social e a vertebración do territorio.

Ferreiro referiuse tamén á última renovación dos contratos do leite, celebrada en abril, na que, segundo denunciou, as produtoras sufriron “un dos maiores golpes da historia”, con baixadas de entre seis e dez céntimos por litro. Engadiu que incluso houbo granxas ás que se lles deixou de recoller o leite.

Ante esta situación, o Sindicato Labrego Galego reclama o cumprimento inmediato da Lei da Cadea Alimentaria e pide á Consellería do Medio Rural que elabore un índice de custos de produción, como xa existe noutras comunidades autónomas, entre elas Andalucía ou o País Vasco. A organización tamén demanda a creación de mesas de diálogo coa Administración nas que estean representadas todas as partes da cadea.

Os custos e a seca agravan a situación

Manolo Villaverde advertiu de que o Estado se atopa nunha situación na que a oferta de leite non cobre a demanda actual e sinalou que o problema pode agravarse pola falta de relevo xeracional e o peche de granxas.

O gandeiro de Forcarei alertou tamén dos efectos da seca, que cualificou de “terrible”, e do incremento dos custos. Segundo explicou, aos aumentos derivados dos conflitos internacionais sumouse a falta de colleitas e de produción de insumos provocada pola seca, o que obriga as explotacións a mercar no exterior parte da alimentación dos animais. A esta situación engadiu o incremento do prezo do gasóleo.

“Neste contexto e ante o futuro que nos agarda, se temos outra baixada ou non temos suba, a situación vai empeorar”, advertiu Villaverde.

Pola súa banda, Eva Rodríguez Rodríguez sinalou que todo este contexto pode provocar “unha baixada de produción grande”, que podería levar ao sacrificio de animais. A gandeira de Cesuras augurou “un outono moi escuro” e advertiu de que a combinación da seca e do incremento xeral dos custos pode acelerar a desaparición de explotacións leiteiras e provocar un maior abandono do rural, coas consecuencias sociais e económicas que isto implica.

Rodríguez tamén puxo o foco no aumento das enfermidades que afectan o gando debido aos cambios climatolóxicos. Segundo explicou, as pragas están máis activas nas granxas, o que incrementa o risco de enfermidades.

Neste sentido, criticou a actuación da Xunta e puxo como exemplo a situación da lingua azul. A organización reclama que se informe o sector sobre a evolución dos diferentes serotipos por comarcas, despois de sinalar que as vacinas ofrecidas corresponden ao serotipo 4, mentres que, segundo indicou, os que están afectando as explotacións son o 3 e o 8.

O SLG ameaza con accións se non sobe o prezo do leite

De cara ás próximas renovacións de contratos, previstas dentro de dous meses, o Sindicato Labrego Galego denuncia que as industrias lácteas pretenden manter o mesmo prezo do leite que pagaron no período anterior, caracterizado por prezos á baixa.

A organización considera que manter os prezos nun contexto de incremento dos custos e perdas nas colleitas supón, na práctica, unha nova baixada do valor percibido polas explotacións, ao non existir un incremento do importe acorde coa evolución dos gastos de produción.

Por este motivo, o SLG advirte de que, se na próxima renovación dos contratos non se produce un aumento do prezo do leite que perciben as labregas e os labregos, poñerá en marcha un calendario de accións. Entre as medidas previstas figura informar as consumidoras e consumidores sobre as marcas que, segundo o sindicato, explotan as granxas galegas ao destruír o prezo do leite.