O Tribunal de Instancia de Santiago inicia a execución da sentenza polo accidente do tren Alvia
A maxistrada da praza 2 da Sección Penal do Tribunal de Instancia de Santiago de Compostela ordenou, unha vez decretada a firmeza, o inicio da execución da sentenza polo accidente do tren Alvia que descarrilou na curva de Angrois o 24 de xullo de 2013.
No auto, sinala que “procede levar a efecto os pronunciamentos contidos na sentenza na forma e tempo prescritos no Código Penal e nos regulamentos, acordando a práctica das dilixencias necesarias”.
Desta forma, decreta que se dea traslado á representación procesual do maquinista, condenado a dous anos e seis meses de cárcere como autor de 79 delitos de homicidio e 143 delitos de lesións, todos eles por imprudencia grave, a fin de que se pronuncie sobre a posible suspensión da devandita pena “polo motivo previsto no artigo 4.4, parágrafo segundo, do Código Penal, á vista da petición de indulto que se encontra en trámite”.
En canto á responsabilidade civil, liquidada en sentenza e rectificada parcialmente polo fallo definitivo ditado pola Audiencia Provincial da Coruña, require á entidade QBE, como responsable civil directa, para que “no prazo dun mes abone as cantidades liquidadas pendentes de pago en concepto de indemnización, no caso de que non consten totalmente satisfeitas, desagregando importe, concepto e prexudicado”.
A maxistrada tamén decreta dar traslado a QBE, “a fin de que no prazo dun mes presente proposta de liquidación de intereses por cada un dos prexudicados”. Unha vez recibida devandita proposta, segundo consta no auto, conferirase novo traslado ás persoas prexudicadas para que, no seu caso, formulen alegacións na correspondente peza separada. O auto non é firme, pois contra el cabe presentar recurso.