Cultura

O Ministerio de Política Territorial abre a incoación do expediente que recoñece o valor histórico do inmoble como espazo da represión franquista

O Ministerio de Política Territorial e Memoria Democrática iniciou o procedemento para declarar o Vello Cárcere provincial de Lugo como Lugar de Memoria Democrática, nun recoñecemento ao seu valor histórico, simbólico e memorial como un dos principais espazos de represión franquista en Galicia durante a Guerra de España e a posguerra.

O anuncio realizouse durante unha visita á cidade do secretario de Estado de Memoria Democrática, Fernando Martínez, quen estivo acompañado polo delegado do Goberno en Galicia, Pedro Blanco, a subdelegada do Goberno en Lugo, Olimpia Rodríguez, o deputado provincial Miguel Fernández e representantes de asociacións memorialistas.

O inmoble, inaugurado en 1887 e hoxe reconvertido no centro cultural “O Vello Cárcere”, foi escenario do encarceramento de centos de persoas represaliadas tras o golpe militar de xullo de 1936, entre elas cargos públicos, representantes políticos, sindicalistas e cidadáns perseguidos polas súas ideas.

O secretario de Estado destacou as duras condicións de hacinamento que sufriron os reclusos e o papel do cárcere dentro do sistema represivo da ditadura franquista. Tamén puxo o foco na memoria das mulleres presas por motivos políticos, entre elas Consuelo Alonso González, coñecida como “A Comunista”, a única muller executada oficialmente na provincia de Lugo.

Así mesmo, recóllese o uso de man de obra forzada por parte dos presos en obras públicas da cidade no marco do sistema de redención de penas polo traballo imposto pola ditadura.

Coa incoación, o edificio queda inscrito de forma provisional no inventario de Lugares de Memoria Democrática e pasa a contar coa protección prevista na lei estatal. O proceso enmárcase na política de reparación, verdade e garantías de non repetición impulsada polo Goberno central.

A futura declaración sumará este espazo a outros enclaves xa en trámite en Galicia, como o penal das illas de San Simón e San Antón, a cidade de Ferrol e o Pazo de Meirás.