Cultura | Actualidade

O sábado 24 e domingo 25 de maio, 77 escolas e grupos vigueses, con 780 participantes, ofrecerán danza clásica, moderna, hip-hop, tango e máis de xeito gratuíto.

O alcalde Abel Caballero presentou hoxe no Concello a primeira edición do Vigo Dance Festival, que se celebra os días 24 e 25 de maio no Auditorio Mar de Vigo. Trátase dun festival multidisciplinar de danza aberto a todas as escolas, asociacións veciñais e grupos profesionais vigueses, que non pagan inscrición.

En total participarán 780 bailaríns agrupados en 77 formacións, que mostrarán disciplinas como danza clásica, moderna, hip-hop, tango, bailes latinos e máis. O espectáculo do sábado comezará ás 16:00 e rematará ás 20:00 horas; xa o domingo haberá dúas sesións, de 11:00 a 13:30 e de 16:00 a 20:00 horas.

Caballero destacou que a Deputación “quere ofrecer alternativas de ocio e unha nova forma de sentir a cultura da danza e da música”, e avanzou que xa se está a preparar a próxima edición para o outono. O evento conta cun apoio municipal de 64.900 € para garantir a calidade da programación.