Os empresarios galegos reclaman que se vexa que "Galicia é unha potencia mundial"
O Círculo de Empresarios de Galicia celebrou en Vigo a primeira xornada de RE_GALICIA 2026, un foro de alto nivel baixo o lema “Repensar Galicia. Redefinir o futuro” que reuniu a máis de vinte líderes empresariais, institucionais e do coñecemento. O encontro, enmarcado no programa Capacita Directivos co respaldo do IGAPE, clausurouse cun xantar-coloquio presidido pola conselleira de Economía e Industria, María Jesús Lorenzana.
María Borrás, presidenta do Círculo, abriu a xornada apelando á teimosiña como vantaxe competitiva diferencial: “Os grandes cambios non adoitan fracasar por falta de visión, fracasan por falta de perseveranza”. Pola súa banda, Norberto Penedo, do IGAPE, enmarcou os eixos de traballo da Consellería na reindustrialización, a soberanía tecnolóxica, a diversificación de mercados e o aproveitamento das oportunidades en seguridade e defensa.
Ao longo do día, unha vintena de empresarios e expertos debateron en diferentes mesas sobre os sectores e as pancas que definirán a competitividade galega na próxima década: internacionalización, tecnoloxía, industria propia, territorio como activo de marca e comunicación. O diagnóstico foi compartido: Galicia conta cunha estrutura industrial sólida, exporta o 8 % de todo o que vende España ao exterior e alberga empresas de primeiro nivel mundial en sectores como a automoción, a pesca, a moda, a biotecnoloxía e a tecnoloxía. O problema, concluíron, non é o que se fai, senón o que non se conta.
De forma transversal, a xornada deixou catro ideas clave. A competitividade futura non dependerá unicamente de adoptar tecnoloxía, senón de desenvolver capacidades propias en intelixencia artificial, software, fotónica ou industria avanzada. Galicia entra nun novo ciclo económico que redefine as regras e esixe decisións estratéxicas para a próxima década. O posicionamento como nodo atlántico europeo, con capacidades industriais, loxísticas, marítimas e tecnolóxicas, ofrece unha narrativa diferencial de crecente relevancia xeoestratéxica. E, por último, a intelixencia empresarial galega: unha forma propia de entender os problemas, baseada na prudencia, o realismo e a capacidade de adaptación, que permitiu a moitas empresas galegas competir globalmente desde unha esquina do mapa.
As conversas estiveron conducidas por profesionais do ámbito da comunicación, a empresa e a mediación: Loreto Peteiro (Quincemil e Treintayseis), Betty Lepina (CharmHunters Retail), Pablo López (Foro de Innovación e Tecnoloxía do Círculo de Empresarios de Galicia), Eva Núñez (consultoría) e Pedro Pablo Gutiérrez (Universidade de Vigo).
María Borrás pechou a xornada poñendo cifras ao que durante o día se ilustrara con exemplos. “Somos dous millóns e medio de persoas. Unha poboación envellecida. Nunha esquina do mapa. Sobre o papel, non deberiamos xogar nesa liga. Pero estamos a xogala”. Borrás atribuíu ese resultado a algo máis difícil de medir e de copiar: unha maneira de funcionar en rede, de competir pola mañá e sentar na mesma mesa pola tarde. “Esa cabeza colectiva é a nosa vantaxe real. A que non aparece en ningún ranking”. Ademais, definiu o Círculo cunha soa frase: “Non é un lugar onde se dan charlas. É onde a Galicia empresarial pensa en voz alta”.
RE_GALICIA 2026 forma parte do programa Capacita Directivos do Círculo de Empresarios de Galicia, que ao longo do ano percorrerá distintas localidades da comunidade con xornadas de menor formato antes dun peche colectivo no último trimestre do ano.